Resei politsiiasy Jemqorlyqpen kúres qorynyń zańgeri Liýbov Soboldiń páterin tintip, ózin tergeýge alyp ketti. Bul aqparatty 25 jeltoqsanda Aleksei Navalnyidyń Jemqorlyqpen kúres qory habarlady.
"Liýbov Soboldi jaýap alý úshin tergeý komitetine alyp ketti. Páterine tintý júrgizildi" dep jazdy qor Twitter-degi paraqshasynda.
Navalnyi jaqtastary ony 44 jastaǵy Kreml synshysyn ýlaý isine qatysy bar delingen FSB ókilimen kezdesýge tyrysqany úshin qýdalýy múmkin deidi.
21 jeltoqsanda - "Navalnyidyń FSB qyzmetkeri Kýdriavtsevpen aýdio-áńgimesi" jariialanǵan kúni keshke Sobol men taǵy birneshe belsendi (arasynda jýrnalister de bar) Konstantin Kýdriavtsevpen kezdesýge tyrysqan. Sol kúni politsiia Soboldy ustap áketip, sálden keiin bosatqan.
Eýropadaǵy táýelsiz úsh zerthana Navalnyidyń júikeni sal etip tastaityn "Novichok" ýymen ýlanǵanyn anyqtaǵan. Himiialyq qarýǵa tyiym salý jónindegi halyqaralyq uiym tujyrymdy rastaǵan.
Batys elderi Reseidi Navalnyidyń ýlanýyn jan-jaqty zertteýge shaqyrǵan. Resei biligi "saiasatkerge ý berý" isi boiynsha qylmystyq is qozǵaýdan bas tartqan. Oqiǵaǵa arnaiy qyzmettiń qatysy bar degen tujyrymdy da teristegen.
