Frantsiianyń TotalEnergies kompaniiasy Katardyń energetikalyq jobalaryndaǵy alǵashqy iri sheteldik seriktes boldy. Eýropa kompaniiasy North Field East (NFE) gaz jobasynyń 6,25 paiyz úlesin shamamen eki milliard dollarǵa satyp aldy. Bul jóninde France 24 telearnasy habarlady, dep jazady Azattyq.
"NFE Katarǵa syǵymdalǵan tabiǵi gaz óndirisin 2027 jylǵa qarai 60 paiyzdan asa ulǵaitýǵa kómektesedi" dep habarlady TotalEnergies. Bul kelisim kompaniianyń Reseiden ketkenine orai tartqan shyǵynyn jabýǵa járdemdespek.
Katardyń energetika ministri Saad Sherid ál-Kaabi birlesken kásiporyn jumysy 2054 jylǵa deiin josparlanǵanyn aitty. "Ózge shetel kompaniialary da NFE úlesin satyp alady, biraq olardyń eshbiriniń úlesi TotalEnergies úlesinen kóp bolmaidy" degen Kaabi ózge shetel kompaniialarynyń atyn atamady. Bul saladaǵy qaýesetterge qaraǵanda, sóz - ExxonMobil, Shell jáne ConocoPhillips týraly bolýy múmkin.
3 maýsymda Eýroodaq Ýkrainaǵa basyp kirýine bailanysty Reseige sanktsiianyń altynshy paketin salǵan. Sanktsiiaǵa Resei munaiy da ilinip, shektelgen. Eýropa odaǵy alty ai ishinde Reesi munaiyn, segiz ai ishinde munai ónimderin importtaýdan bas tartatyndyǵy jóninde sheshim qabyldaǵan. Eýropa elderi Resei munaiynyń ornyn basatyn energoresýrstar izdestirip jatyr.
