Foto: ashyq derekkóz
Parijdegi áigili Lývr mýzeiinen urlanǵan qundylyqtardyń jalpy shyǵyny 88 million eýro dep baǵalandy, dep habarlaidy Ult.kz RIA Novosti-ge silteme jasap.
Bul týraly qala prokýrory Lor Bekko RTL radiosynyń efirinde málimdedi.
«Lývr direktory keltirilgen zalaldy 88 million eýro kóleminde baǵalady», – dedi ol.
Bekkonyń aitýynsha, bul soma mýzeige keltirilgen tarihi zalalmen salystyrýǵa kelmeidi. Ol qylmyskerlerdiń urlanǵan áshekeilerdi eritip ne bólshektep satý arqyly paida taba almaitynyn atap ótti. Sol sebepti prokýror olar «mádeni qundylyqtardy búldirmese eken» degen úmitin bildirdi.
Urlyq ótken jeksenbi kúni bolǵan. Prokýratýra dereginshe, tórt adamnan turatyn top bul qylmysty nebári tórt minýttyń ishinde júzege asyrǵan. Onyń ekeýi tikelei mýzei ishine kirgen.
Qylmyskerler barlyǵy frantsýz patshaiymdary men imperatritsalaryna tiesili toǵyz áshekeidi urlap ketken. Solardyń biri tabylyp, mýzeige qaitarylǵan.
BAQ málimetinshe, kollektsiiadaǵy eń iri asyl tas — salmaǵy 140 karattan asatyn «Regent» gaýhary urlanbaǵan.
Frantsiia Ishki ister ministri Loran Nýnes urylardyń Lývrǵa tereze arqyly kirgenin, oǵan avtokólikke ornatylǵan baspaldaqty paidalanyp, áinekti «bolgarkamen» kesip túskenin aitty. Ol qylmysty sheteldikter jasaýy múmkin ekenin de joqqa shyǵarmady.
Qylmyskerler keiin oqiǵa ornynan skýtermen qashyp ketken. Abyroi bolǵanda, eshkim zardap shekpedi.
Parijdiń burynǵy politsiia prefektisi urylardyń murajaidy aldyn ala muqiiat zerttegenin boljady. Qazir prokýratýra tergeý amaldaryn júrgizip jatyr.
Aita keteiik, Telegram negizin qalaýshy Pavel Dýrov bul oqiǵany «bir kezderi uly bolǵan Frantsiianyń quldyraýynyń belgisi» dep atap, urlanǵan áshekeilerdi satyp alyp, mýzeige qaitarýǵa daiyn ekenin málimdedi.
