Frantsiia 5 myńnan astam adam qatysatyn is-sharalardy ótkizýge tyiym saldy. Bul qadam koronavirýstyń taralýyna jol bermes úshin jasalyp otyr, dep habarlaidy France24.
Eldiń densaýlyq saqtaý ministri Olive Veran senbi kúni úkimet otyrysynan keiin osylai dep málimdedi.
«Búkil elde jabyq ǵimarattaǵy 5 myńnan astam adam qatysatyn úlken jiyndar keiingi qaldyrylady. Ashyq aspan astyndaǵy sharalar da ótpeidi. Ol jaǵdaida ártúrli aýdanda turatyn adamdar bir-birimen aralasyp, virýs taralýy múmkin», - dedi densaýlyq saqtaý ministri.
Olive Veran sondai-aq, halyqqa bir-birimen qol alyspai, frantsýz halqynyń ejelden bergi betten súiip amandasý dástúrin ýaqytsha umyta turýǵa shaqyrdy.
Osy tyiymǵa bailanysty Kann qalasyndaǵy jyljymaly múlik kórmesi maýsym aiynda ótetin boldy. Odan bólek, jeksenbige belgilengen Parij marafony da keiinge qaldy. Degenmen Birinshi liganyń fýtbol matchtary keste boiynsha óte beredi.
«Munyń bári ýaqytsha. Ýaqyt óte kele bári ózgeredi. Bul shekteý sharalary koronavirýstyń taralýyna múmkindik bermeidi degen úmittemin», dep túsindirdi ministr.
Onyń aitýynsha, halyq kerek ony-munysyn satyp alyna, saýda jasaýyna bolady, alaida maqsatsyz jolǵa shyqpai, múmkindik bolsa jumysty úiden istegeni durys.
Olive Veran Frantsiiada koronavirýs juqtyrýdyń 16 jańa faktisi tirkelgenin aitty. Sonymen eldegi virýsqa shaldyqqandar sany 73 boldy. Eki adam atalmysh indetten kóz jumǵan.
