Frantsiia prezidenti Emmanýel Makron premer-ministri Edýar Filipp pen úkimettiń otstavkaǵa ketý týraly ótinishin qanaǵattandyrdy.
Qazirgi ministrler kabineti jańa úkimet taǵaiyndalǵanǵa deiin burynǵy mindetin atqara beredi.
Úkimettiń aýysatyny jaily áńgimelerdiń aitylyp júrgenine biraz boldy. Endi eki jyldan keiin prezidenttik merzimi aiaqtalatyn Makron jaqynda "jańa komanda" qurylatynyn jariia etken bolatyn dep habarlaidy Radio France Internationale. Buǵan koronavirýs indetiniń saldary da sebep bolǵan.
Kei boljamǵa súiensek, Makron qazir óz saiasatyn áleýmettik baǵytqa kóbirek buryp, onyń kabineti eń aldymen biznesti qoldaýdy maqsat tutady degen kózqarasty jumsartýǵa tyrysady.
Edýar Filipp premer-ministr qyzmetine qaita taǵaiyndala ma, joq pa, ázirge belgisiz. Elisei saraiy (Frantsiia prezidentiniń otyratyn jeri – red.) jańa úkimet jetekshisiniń kim bolatynyn jaqyn ýaqytta jariialaitynyn habarlady.
Filipp 2017 jyldyń 15 mamyrynan osy ýaqytqa Frantsiia premer-ministri boldy. Onyń aldynda, 2010 jyldan beri Gavr qalasynyń meri boldy. Biyl 28 maýsymda Edýar Filipp osy qala basshysynyń sailaýynda taǵy da jeńiske jetken.
