Frantsiia aýrýhanalarynda jaǵdai qiyn. Deltadan juqpalyraq dep tanylǵan omikron shtamyn ekpe alǵan dárigerler de juqtyryp jatyr, sol sebepti olar jumystan úzilis alýǵa májbúr. Al ekpe saldyrmaǵan dárigerler jumystan shettetilýde, dep habarlaidy QazAqparat Euronews resýrsyna silteme jasap.
Atalǵan ahýal saldarynan astanalyq óńirde qyzmetkerlerdiń jetispeýshiliginen jansaqtaý bólimderindegi tósek-oryn sany 20%-ǵa qysqardy.
Sonymen qatar statsionarlarǵa virýs juqtyrǵandar kóp túsýde. Aýrýhana jetekshileri qyzmetkerlerge túsken salmaqqa alańdaýly.
«Ázirge bizdiń brigadalar shydamdylyq tanytýda, sebebi eshteńege qaramai, aýrýhanaǵa jumysqa kelýge májbúr. Besinshi tolqynnyń erekshiligi – qazirgi kezde dárigerler ekpe alǵan jaǵdaida aýrýhanaǵa túspeitin naýqastar úshin kúresip jatyr», - dedi Delafontaine aýrýhanasy direktorynyń orynbasary Ioan Mýre.
Keibir aýrýhanalardaǵy naýqastar qorlardyń tapshylyǵynan jaqsy jabdyqtalǵan jáne virýs juqtyrǵan naýqastary az basqa emdeý mekemelerine aýystyrylyp jatyr.
Olardy tasymaldaý úshin sanitarlyq aviatsiia qoldanylaýda.
Mundai jaǵdai eki jaǵdaiy asa aýyr naýqasty eldiń ońtústigindegi Antibtan soltústiktegi Lillge aýystyrý kezinde bolǵan.
«Munyń bári ońai emes. Biz eki jyl buryn bolǵan ahýalǵa qaita oralǵandaimyz. Hirýrgiialyq otalardy keiinge qaldyrdyq. Odan bólek, koronavirýstyń bul tolqynymen kúresý úshin eńbek demalysynan ýaqytynan erte shyqtyq», - deidi medbike.
Kóp aýrýhanalarda demalys kúnderi jumys isteý, jospardaǵy otalardy keiinge qaldyrý qalypty jaǵdaiǵa ainaldy.
Meditsinalyq qyzmetkerler men olardy usynatyn kásipodaqtar da prezidenttik sailaýǵa qalǵan tórt ai ishinde bilik ornaǵan ahýaldy esepke alyp, tiisti sheshim qabyldaidy dep úmittenedi.
