20 aqpan kúni Jambyl atyndaǵy Qazaq memlekettik akademiialyq filarmoniiasynyń Úlken zalynda frantsýz kompozitory Fransis Pýlenktiń «Adam daýysy» atty monooperasy qoiylady, dep habarlaidy Ult.kz.
Jan Koktonyń pesasy negizinde jazylǵan bul lirikalyq týyndy psihologiialyq iirimderge toly HH ǵasyrdaǵy opera óneriniń jaýhary sanalady. Bir ǵana keiipkerdiń taǵdyry men ishki arpalysyna qurylǵan bul qoiylym kórermenge jalǵyzdyq, mahabbat jáne qoshtasý sezimderin tereńinen sezinýge múmkindik beredi.
Sahnadaǵy dramalyq obrazdy Qazaqstannyń eńbek sińirgen qairatkeri Dáriia Júsip somdaidy. Qoiylymda ol kórermenge akterlik oiynymen qatar vokaldyq sheberligin de pash etedi. Operany Qanat Omarovtyń dirijerligimen T.Ábdirashev atyndaǵy QR Memlekettik akademiialyq simfoniialyq orkestri súiemeldeidi.
Qoiylymnyń qazaq tilinde sahnalanýy – otandyq óner úshin mańyzdy qadam. Sebebi kórermen qaýymǵa klassikalyq týyndyny ana tilinde tyńdap, túsinýge múmkindik beredi.
