Kórneki foto: Kirill Kýhmar/TASS
Almaty oblysy Eńbekshiqazaq aýdanyndaǵy 3500 gektar jer memleketke qaitaryldy, - dep habarlaidy "Ult aqparat" oblystyq prokýratýranyń saityna silteme jasap.
"Almaty oblysynyń prokýratýrasy el basshylyǵynyń tapsyrmasyn oryndaý sheńberinde Eńbekshiqazaq aýdanyndaǵy 3500 gektar jerdi qaitaryp berdi. Bul jer 2017 jyly Forbes tizimindegi belgili kásipkerge shalǵaidaǵy (maýsymdyq) mal sharýashylyǵyna arnalǵan jerler quramynan shyǵarý jolymen zańsyz berilgen.
Qazirgi ýaqytta úshinshi tulǵalarǵa jerdi qaita berý faktilerin boldyrmaý maqsatynda atalǵan jerlerdi jergilikti turǵyndar úshin qoǵamdyq jaiylymdarǵa berý boiynsha jumystar júrgizilip jatyr", - delingen habarlamada.
Vedomstvo málimetinshe, jyl basynan beri joǵary laýazymdy tulǵalar men iri biznesmenderge tiesili 26,8 myń gektar jer, kadastrlyq quny 714 million teńge memleket paidasyna qaitarylǵan.
"Bul jerler jyldar boiy maqsatyna sai paidalanylmaǵan, jemshóp daqyldaryn ósirý júzege asyrylmaǵan, osy sharýashylyqtardyń balansynda aýylsharýashylyq janýarlary da bolmaǵan. Al basqa adal fermerler egistik jáne jaiylymdyq jerlerge óte muqtaj bolǵan", - delingen habarlamada.
