Kórermenge fonogrammany paidalanýmen ótetin kontsertke bilet satyp alý nemese odan bas tartý múmkindigi beriledi. Bul týraly Senattyń jalpy otyrysynda QR Mádeniet jáne sport ministri Aqtoty Raiymqulova aitty, dep habarlaidy "Ult aqparat".
Otyrysta Májilis maquldaǵan «Qazaqstan Respýblikasynyń keibir zańnamalyq aktilerine mádeniet máseleleri boiynsha ózgerister men tolyqtyrýlar engizý týraly» Qazaqstan Respýblikasy Zańynyń jobasy jóninde baiandama jasaǵan ministrdiń aitýynsha, kontserttik oiyn-saýyq is-sharalaryn ótkizý kezinde týyndaityn birqatar problemalar bar. Oryndaýshylar tarapynan kontsertter ótkizý kezinde ádepsiz minez-qulyq kórsetý, sahnada uqypyz shyǵý úrdisi oryn alǵan, josparlanǵan kontsertterdi buzý, ádepsiz sózderi bar repertýar tańdaý, kórermenderdi habardar etpei fonogrammany paidalanýǵa jol berilgen birqatar oryn alǵan faktiler de kezdesedi.
«Osy oraida, Zań jobasy aiasynda zańnamalyq deńgeide oryndaýshylardyń osyndai minez-qulqyna jol bermeý boiynsha birqatar mindettemelerdi engizý arqyly osy máselelerdi barynsha retteýge tyrystyq. Olardyń ishinde mańyzdy normalardyń biri - mýzykalyq shyǵarmalardy oryndaýshylarynyń fonogrammalardy qoldanýy týraly kórermendi habarlaý. Fonogrammalardy paidalaný tártibin zańǵa táýeldi aktide aiqyndalatyn bolady. Barlyq jarnamalyq ónimderde jáne kassalar janynda mindetti túrde fonogrammany paidalaný boiynsha habarlama beriledi. Bul kórermenge fonogrammany paidalanýmen ótetin kontsertke bilet satyp alý nemese odan bas tartý tańdaýyna múmkindik beredi jáne bilettiń qunyna da áser etedi», - dedi Aqtoty Raiymqulova.
