QR Indýstriia jáne infraqurylymdyq damý ministri Roman Skliar FlyArystan otandyq loýkosteriniń qyzmeti týraly aityp berdi, dep habarlaidy QazAqparat tilshisi.
«Búginde FlyArystan ataýymen málim jańa biýdjettik áýe kompaniiasy 12 kúnde 16 myńǵa tarta bilet satyp úlgerdi. Atalǵan kompaniianyń qyzmetine suranys óte joǵary», - dedi ministr.
Onyń paiymdaýynsha, 1 mamyrdan bastap biylǵy jyldyń sońyna deiin FlyArystan 1 millionǵa jýyq jolaýshyny tasymaldaýy múmkin.
«Bilet quny ulttyq áýe tasymaldaýshylarmen salystyrǵanda kem degende eki esege arzan. Eksperiment túrinde Azamattyq aviatsiia komitetiniń tóraǵasy meniń kózimshe Nur-Sultannan Almatyǵa jáne keri baǵytta elektrondyq formatta 15 myń teńgege bilet satyp aldy», - dedi R. Skliar.
Budan buryn habarlanǵandai, Qazaqstannyń birinshi loýkosteri FlyArystan kompaniiasy Almaty men Nur-Sultan qalalarynyń arasyndaǵy turaqty bailanysty 1 mamyrda ashady. Qos qala arasyndaǵy kúndelikti áýe qatynasyn syiymdylyǵy 180 oryndyq, zamanaýi reaktivti Airbus A320 ushaqtary qamtamasyz etedi. Bir jaqqa bilet quny áýejai alymdarymen qosa eseptegende 6999 teńgeden bastalady.
