Qazaqstannyń alǵashqy loýkosteri FlyArystan Almatydan Shymkent pen Pavlodarǵa bilet sata bastady. Atalmysh baǵyttar boiynsha tolyq tehnikalyq tekseris pen salony rekonfigýratsiiadan ótken, 180 oryndyq Airbus A320 áýelainerleri kúndelikti qatynaityn bolady, dep habarlaidy QazAqparat kompaniianyń baspasóz qyzmetine silteme jasap.
«Ońtústik astanadan shyraily Shymkentke deiin jol júrý uzaqtyǵy - 1 saǵat 20 minýt. Qos qala arasyndaǵy birjaqty qatynaý quny 4999 teńgeden bastalady. Pavlodarǵa bilet quny barlyq áýejai alymdarymen qosa eseptegende 6999 teńgeden bastalyp, ol jaqqa jolaýshylar 1 saǵat 50 minýtta jete alady. Biletterdi www.flyarystan.com saitynan brondap, oǵan qosa jolaýshylar óz qalaýymen qosymsha júk borttyq taǵamǵa tapsyrys berý, prioritetti otyrǵyzý syndy qyzmet túrlerine tapsyrys bere alady» delingen habarlamada.
Almatydan Nur-Sultan, Taraz, Oral men Qaraǵandyǵa qatynaityn reister birinshi mamyrdan oryndala bastasa, kópten kútken Shymkent pen Pavlodarǵa qatynaý 30 mamyrda bastalady.
«Shymkent pen Pavlodar kezdeisoq tańdalǵan joq. Birinshisi - ońtústik óńiridiń bas qalasy ekeni sózsiz. Odan jáne oǵan kúndelikti júzdegen adam sapar shegedi. Almaty-Shymkent-Almaty baǵyty - áýe jolaýshylarynyń kópten kútken baǵdary. Al Pavlodar men Almatynyń arasynda qonaqqa baryp-keletin jolaýshylar, kásipkerlermen qatar, soltústik-shyǵys óńiriniń kórki - Baianaýyl eldi mekenin kórgisi keletin týrister de barshylyq ekenin eskergen jón. FlyArystan usynyp otyrǵan arzan baǵamen biletti brondap alatyn otandastar sany kóp bolyp, olar tiimdi tarifti biletterdi alyp úlgeredi degen senimdemiz. Sebebi arzan baǵaly oryndar ádette tez satylyp ketetinin eskergen jón», - deidi FlyArystan-nyń satý jáne marketing bóliminiń direktory Janar Jailaýova.
FlyArystan barsha jolaýshylarǵa tarif erejelerimen muqiiat tanysyp, tolyq aqparatty resmi saittan alýǵa keńes beredi.
