2022 jyldyń 4 aqpanynda Fitch Ratings halyqaralyq reiting agenttigi Qazaqstan Respýblikasynyń egemen kredit reitinginiń «turaqty» boljamdy «BBB» deńgeiin rastady, bul - edáýir fiskaldyq pozitsiia men aýqymdy syrtqy rezervterdiń kórsetkishi, dep habarlaidy QR Ulttyq bankiniń baspasóz qyzmeti.
Agenttik memlekette oryn alǵan qańtar oqiǵalary bútindei alǵanda ekonomika ósiminiń traektoriiasyna asa yqpal ete qoimaǵanyn atap ótti. 2022 jyly JIÓ ósimi 3,9% deńgeiin quraidy dep boljanǵan. Agenttiktiń pikirinshe, OPEK+ kelisimine sáikes munaidy óndirýdiń josparly artýy, tabiǵi resýrstarǵa qatysty álemdik suranystyń ósýi, iri energetikalyq jobalarǵa jasalatyn investitsiialar, sondai-aq aýylsharýashylyq óndirisi kólemderiniń qalpyna kelýi qazaqstandyq ekonomikanyń ósimine qoldaý kórsetetin bolady.
Kredit reitinginiń saqtalýyna septigin tigizetin basty faktor – memlekettiń aýqymdy syrtqy rezervteri bolyp qalýda. Fitch Ratings baǵalaýy boiynsha 2021 jyldyń sońynda halyqaralyq rezervter JIÓ-niń 46%-yn quraǵan. Bul kredit reitingi Qazaqstanmen salystyrýǵa keletin memleketter toby boiynsha medianalyq kórsetkishten áldeqaida joǵary. Degenmen kredit reitingi deńgeiles memlekettermen salystyrǵanda Qazaqstannyń shikizattyq taýarlarǵa táýeldiligi, infliatsiia deńgeiiniń joǵarylyǵy men ekonomikalyq saiasat baǵdarlamasynyń jetkilikti shyńdalmaǵandyǵy týraly qorytyndy berildi.
Fitch Ratings analitikteriniń boljamyna sáikes 2022 jyldyń sońyna qarai infliatsiia deńgeii 7%-dy quraidy jáne 2023 jyldyń qorytyndysy boiynsha nysanaly dáliz shegine qaitady. Agenttik infliatsiiany tómendetý basty mindet ekenin atap ótti jáne áleýmettik-ekonomikalyq jaǵdaidy jaqsartýǵa baǵyttalǵan edáýir keńeitilgen josparmen qatar infliatsiiany turaqtandyrý boiynsha qabyldanǵan jedel ekonomikalyq sharalarǵa erekshe nazar aýdardy.
Sondai-aq, Fitch Ratings bank sektoryndaǵy retteý jáne qadaǵalaý tájiribesiniń jaqsarǵanyna basa nazar aýdaryp, onyń kórsetkishteriniń jaqsarǵanyn atap ótti. Bank sektorynyń kórsetkishteri de jaqsarýda: jumys istemeitin kreditter deńgeii osyǵan deiingi eń tómen kórsetkishke – 3,3% jetti, kapital men ótimdiliktiń jetkiliktiligi qamtamasyz etilýde. Sonymen qatar, kredit reitingi boiynsha deńgeiles memleketter tobymen salystyrǵanda depozitter dollarizatsiiasynyń joǵary deńgeii men kreditteýdiń, sonyń ishinde ipotekalyq kreditteýdiń qarqyndy ósimi saqtalýda.
Fitch Ratings pikirine sáikes kredit reitinginiń dinamikasy saiasi jáne áleýmettik damý, memlekettik basqarýdy jetildirý men ekonomikalyq saiasattyń baǵyttaryna bailanysty bolady.
