QR bokstan qyzdar ulttyq quramasynyń bas bapkeri Vadim Prisiajniýk kásipqoi boksshy Firýza Sháripova men Kristina Hammerdiń Qazaqstan atynan Olimpiada oiyndarynda óner kórsetkisi keledi degen áńgimege núkte qoidy, dep habarlaidy QazAqparat tilshisi.
QR Boks federatsiiasynyń málimetinshe, Vadim Prisiajniýk atalǵan boksshy qyzdardy elimizdiń qyzdar ulttyq quramasynyń sapyna kirip, aldaǵy ýaqytta ótetin jarystarǵa qatysýǵa usynys jasaǵan.
«Eger adam bir nárse jasaǵysy kelse, onda sózden iske kirisedi. Biz Firýza Sháripovany birneshe márte shaqyryp, Kristina Hammerdiń týystaryna qońyraý shaldyq. Olardy Qazaqstanǵa kelip, ózderin kórsetýin ótindik. Alaida, olarǵa muny jasaýǵa áiteýir bir jaǵdailar únemi kedergi bolyp keledi. Endi Qazaqstan Boks federatsiiasynyń atynan jáne bas bapker retinde Sháripova men Hammerdi Qazaqstanǵa kelip, mamyrda Shymkentte ótetin respýblikalyq spartakiadaǵa nemese shildede Nur-Sultanda ótetin Prezident kýbogyna qatysýǵa shaqyramyn. Jan-jaqty járdem kórsetýge ýáde beremin. Tokio Olimpiadasyna az ýaqyt qaldy, áreket etý qajet. Ne bolmasa bul máselede piar jasaýdy doǵaryp, sońǵy núkte qoiý kerek», - dedi V.Prisiajniýk.
Aita keteiik, 2019 jyldyń basynda WBO nusqasy boiynsha álem chempiony Kristina Hammer men kásibi boksta birneshe belbeýge ie bolǵan Firýza Sháripova Olimpiada oiyndarynda Qazaqstan atynan jarys jolyna shyǵýǵa nietti ekendikterin málim etken bolatyn.
Sháripovanyń menedjeriniń aqparatyna qaraǵanda, Firýzaǵa basqa memlekettiń týy astynda Olimpiada oiyndarynda jarys jolyna shyǵýy úshin million dollar usynylǵan. Biraq, sportshy mundai usynystan bas tartqan.
60 keli salmaq sanatyna deiin bokstan qyzdar quramasynyń kóshbasshylary, álem chempionatynyń júldegerleri Karina Ibragimova men Aijan Qojabekova jáne eýropalyq týrnir chempiony Rimma Volosenko da Firýza Sháripovaǵa videoúndeý joldap, Qazaqstanǵa shaqyrdy.
«Firýza, biz seni qurmetteimiz jáne kásibi boksqa aýysý sheshimińdi de qoldaimyz. Seni spartakiadada kútemiz, Prezident kýbogy da ótedi. Kelip ózińniń bizden myqty ári úzdik ekenińdi dálelde», - deidi boksshy qyzdar úndeýlerinde.
