Túrkistan oblysynyń Maqtaral aýdanynda Firdoýsi atyndaǵy mektepte oramalyn sheshýden bas tartqan jeti oqýshy qyzdyń ata-anasy mektepten qyzdarynyń qujattaryn alyp ketti. Bul týraly mektep direktory Janar Mamyrova habarlady, dep jazady Azattyq.
Janar Mamyrovanyń aitýynsha, mekteptegi joǵarǵy synyptarda oqityn 203 oqýshy qyzdyń 10-y oramalyn sheshýden bas tartyp otyr. Jańa oqý jyly bastalǵaly oramalyn sheshýge kelispegen jeti qyzdyń ata-anasy mektepten qyzdarynyń qujattaryn alyp, basqa oqý ornyna ornalastyrǵan.
- Oramalyn sheshýge kelispei sabaqqa kelmegen 10 oqýshynyń ekeýi aýyryp jatqany belgili boldy. Bireýi basqa mektepke aýysýyna bailanysty qujattaryn rásimdep otyr. Tórteýiniń ata-anasyna Túrkistan oblystyq bilim salasyndaǵy baqylaý departamenti aiyppul salǵan. Qalǵan úsh oqýshy jáne olardyń ata-anasymen jumys júrgizilip jatyr, - deidi mektep direktory.
Túrkistan oblystyq bilim basqarmasy "Firdoýsi mektebindegi jaǵdai birqalypqa túskenin" jáne áli de túsindirý jumystary júrgizilip jatqanyn málimdedi.
Qyrkúiektiń 6-sy kúni Firdoýsi aýylynda mektepke oramalyn sheship barýdan bas tartqan 13 oqýshy qyzdyń ata-anasyna bes ailyq eseptik kórsetkishke (bir ailyq eseptik kórsetkish - 2405 teńge) teń aiyppul salynǵan.
