Túrkistan oblysy Maqtaral aýdanyndaǵy Firdoýsi aýylynda biliktiń talabymen mektepke oqýshy qyzdardy oramalmen kirgizbegen Firdoýsi mektebiniń direktory Janar Mamyrovaǵa qoqan-loqqy jasaldy.
Janar Mamyrovanyń aitýynsha, jańa oqý jylynan bastap ministrdiń buiryǵymen oqýshy qyzdardy oramalmen mektepke kirgizbegeni úshin ózine keibir aýyl turǵyndary qoqan-loqqy kórsetken. "Meni oqýshy qyzdarǵa oramalyn sheshkizgenim úshin aiyptaidy. Uialy telefonyma belgisiz nómirlerden oramaldy sheshkizgeniń úshin atyp ketemiz degen xattar túsken soń politsiiaǵa aryzdandym" deidi direktor.
Janar Mamyrovanyń Maqtaral aýdandyq ishki ister bólimine aryz túsirgenin oblystyq ishki ister departamentiniń baspasóz xatshysy Saltanat Qarakózova rastady. Onyń sózinshe, aryzǵa sáikes Qylmystyq Kodekstiń "qorqytý" baby boiynsha is qozǵalǵan. Sotqa deiingi tergeý amaldary júrgizilip jatyr.
Firdoýsi atyndaǵy mektepte oramalyn sheshýden bas tartqan oqýshy qyzdardy qoldap, mektep aldynda narazylyq bildirgen segiz ata-ana buǵan deiin ákimshilik jaýapqa tartylǵan. Ártúrli sebeppen 15 oqýshy basqa mektepterge aýysqan.
Qyrkúiektiń 6-sy kúni Firdoýsi aýylynda mektepke oramalyn sheship barýda bas tartqan 13 oqýshy qyzdyń ata-anasyna bes ailyq eseptik kórsetkishke (bir ailyq eseptik kórsetkish - 2405 teńge) teń aiyppul salynǵan.
Firdoýside oramal daýy bilim jáne ǵylym ministrliginiń 2016 jyly qańtarda shyǵarǵan biryńǵai mektep formasy erejesi týraly №26 buiryǵynan keiin týyndai bastaǵan. Qujatta mektepte qandai da bir dindi nasihattaityn kiim kiiýge tyiym salynǵan. Bilik buiryqtyń oryndalýyn talap etse, ata-analar dástúrdi alǵa tartyp, qyzdarynyń mektepke oramalsyz barýyna qarsy shyǵady.
Ministrlik buiryǵy byltyr kúzde Aqtóbe, Batys Qazaqstan jáne Mańǵystaý oblystarynda da keibir mektep ákimshiligi men ata-ana arasyndaǵy "oramal daýyna" sebepshi bolǵan. Atalǵan aimaqtarda mektep ákimshiligi sabaqqa kirgizbei qoiǵan ondaǵan oqýshynyń ata-anasy sotqa aryz bergen. Turǵyndar shaǵymyn qaraǵan sottar Bilim jáne ǵylym ministrligi men mekteptiń ustanymyn qoldaǵan.
