Finliandiia Reseimen shekarasynda qorshaý turǵyzýy múmkin. Bul týraly Finliandiia ishki ister ministri Krista Mikkonen habarlady. 9 maýsymda úkimet parlamentke shekara qyzmeti týraly zańǵa tiisti ózgertýlerdi neǵurlym tezirek engizý jóninde usynys jasady, dep habarlaidy Azattyq radiosy.
Dýal qurylysynan bólek, shekarashy sanyn kóbeitip, jańadan tehnikalyq baqylaý quraldary men barlaýshy ushaqtar satyp alý kózdelgen. Bul maqsatqa qajet qarjy kóktemde bólinip qoiǵan. Mikkonenniń sózinshe, shekara qyzmeti kórshi eldiń saiasi qysym jasaýǵa migranttardy paidalanatyn "gibrid yqpalyna" toitarys berýge de daiyn bolýy kerek. Mundai tásil 2021 jyly Belarýs pen Polsha shekarasynda qoldanylaǵan.
Sonymen birge sheteldikter týraly zańǵa da ózgerister engizilmek. Finliandiiadan pana suraýshylardyń ótinishin shekara beketinde qabyldap, birden qaraityn bolady. Bul Finliandiianyń ózge aimaǵyna nemese Eýropa odaǵynyń ózge elderine migranttardyń aǵylýyna jol bermeý úshin jasalady. Úkimet baiandamasynda halyqaralyq jaǵdaidyń ózgerýine bailanysty Finliandiianyń jaqyn arada jáne uzaq merzimde "gibrid yqpaldyń" keń kólemdi ári kúrdeli túrlerine daiyn bolýǵa ázirlenip jatqany aitylǵan.
Finliandiia men Resei arasyndaǵy shekaranyń uzyndyǵy 1271 kilometr, shekaradan el astanasy Helsinkige deiin 200 shaqyrym.
Resei kúshteri 24 aqpanda Ýkrainaǵa basyp kirgen soń buǵan deiin beitarap memleket bolǵan Finliandiia NATO uiymyna kirýge tilek bildirdi. Kóp uzamai resmi Helsinki Soltústik-atlantikalyq áskeri odaqqa tiisti ótinishin tapsyryp ta qoidy. Biraq osy odaqtyń bir múshesi Túrkiia Finliandiiany uiymǵa qabyldaýǵa qarsy bolyp otyr.
