Qaznette tólqujatynyń forzatsyn muqabadan jyrtyp tastaǵan er adamnyń videosy taralýda. Onyń arasynda shetelge shyqqan el azamattaryn baqylaityn mikrochip bar eken. Bul - jalǵan aqparat, dep habarlaidy Stopfake.kz saity.
QR IIM túsindirgendei, el azamattarynyń tólqujattaryndaǵy chipter baqylaý úshin emes, qujat iesi týraly aqparatty saqtaý úshin paidalanylady.
Bul «Qazaqstan Respýblikasynyń azamaty pasportynyń, Qazaqstan Respýblikasynyń azamaty jeke kýáliginiń, sheteldiktiń Qazaqstan Respýblikasynda turýyna yqtiiarhattyń, azamattyǵy joq adamnyń kýáliginiń, bosqyn kýáliginiń úlgilerin jáne olardy qorǵaýǵa qoiylatyn talaptardy bekitý týraly» Qazaqstan Respýblikasy Úkimetiniń 2013 jylǵy 4 shildedegi № 684 qaýlysynda kórsetilgen.
Osy qaýlynyń 2-babynda QR azamatynyń pasportynda keminde syimdylyǵy 64 Kb jadymen mikroshema bar, onda «qorǵalǵan túrde Qazaqstan Respýblikasynyń azamaty jeke kýáliginiń iesi týraly grafikalyq jáne mátindik aqparat saqtalady» dep jazylǵan.
Mikroshema GPS nemese basqa navigatsiialyq tehnologiialarmen jabdyqtalmaǵan, sondyqtan ol arqyly bireýdi baqylaý múmkin emes.
– Qazaqstanda elektrondyq pasporttar, sondai-aq mikroshemasy (chipi) bar jeke kýálikter 2009 jyldan bastap shyǵarylady. Elektrondyq qujattar ICAO halyqaralyq standartynyń (DOC 9303 standarty) barlyq talaptaryna sáikes keledi. Chip azamat týraly Jeke derekterdi saqtaýǵa arnalǵan jáne jeke tulǵany avtomatty túrde anyqtaýǵa múmkindik beredi.
Tólqujattarda elektrondyq chip Qazaqstan Respýblikasynyń azamaty pasportynyń muqabasy men tóseminiń arasynda ornalasady jáne pasporttyń iesi týraly aqparattyń elektrondyq tasymaldaýshysy bolyp tabylady, onda qorǵalǵan tsifrlyq formatta azamattyń derbes derekteri (Tegi, Aty, Ákesiniń aty, kúni, týǵan jeri, jyly), JSN, fotobeinesi jáne elektrondyq tsifrlyq qoltańba jazylady, – dep túsindirdi vedomstvo ókilderi.
Sondai-aq, tólqujattardaǵy mikroshemalar shekara ótkizý pýnktterinen ótýdi jeńildetý jáne basqa elderdiń pasporttyq-vizalyq baqylaýy jáne qujattardy qoldan jasaý múmkindigin boldyrmaý úshin qajet.
Mundai mikroshemalar AQSh, Kanada, Eýroodaq, Qytai, Japoniia, Malaiziia, Singapýr, Avstraliia, Baltyq elderi jáne TMD quramyndaǵy basqa elderde de qoldanylady.
Demek, Qazaqstan pasporttarynda baqylaý qurylǵylary bar degen aqparat – ótirik.
