QR Premer-Ministriniń birinshi orynbasary Roman Skliar Ravlodarnews.kz aqparat portalyna suhbat berip, Ekibastuzdaǵy apattyń mán-jaiyn aityp berdi, dep habarlaidy QazAqparat agenttigi.
«Árine, bul apattyń aýqymy az deýge bolmaidy. Úsh shaǵyn aýdan zardap shekti. Biraq tutastai alǵanda, qalada tómen bolsa da, jylý rejimi saqtaldy. Stantsiia jumys istep tur.
Energetikalyq qadaǵalaý komiteti apattyń aldyn ala sebebin jariialady. Ol standarttan tys: stantsiia bir retten jelige joǵary qysym berip otyrǵan. Jelidegi qysymdy shamamen 40 paiyzǵa kótergen. Iaǵni, bul jerde tehnikalyq turǵydan qate sheshim qabyldanǵan. Bul magistraldardaǵy úlken 3 apatqa ákeldi, qubyrlar 70 jerden jaryldy. Saldarynan paida bolǵan geizerlerdi bárimiz kórdik, sonyń ishinde áleýmettik jelilerden de. Osyǵan bailanysty barlyq qala jylýsyz qalǵandai kartina qalyptasty.
Qaitalap aitamyn, bul – asa iri apat. Ásirese, 70 úidegi jylý máselesi óte kúrdeli boldy. Bul degenimiz - 5 100 páter, onda 13 myńǵa jýyq adam turady», - dedi Roman Skliar.
Sonymen qatar ol apattyń saldaryn joiý boiynsha qurylǵan jedel shtab kúnine eki ret baspasóz málimetin taratyp kelgenin atap ótti. Degenmen Roman Skliardyń sózinshe, áleýmettik jelilerdegi jalǵan aqparatqa ergender de bolǵan.
«Shtabtan kúnine eki ret baspasóz habarlamasyn tarata otyryp, biz naqty aqparat usyndyq. Múmkin, kópshilik sanaly nemese beisanaly túrde túrli feikterge ergen shyǵar. Biraq men turǵyndardy kinálamaimyn. Desek te kóptegen buqaralyq aqparat quraldary jedel shtab halyqty aldap jatyr dep jazdy. Senseńiz, bizge munyń qajeti joq: eger páterlerge jylý berilmese, biz solai jazdyq», - dedi vitse-premer.
Eske salaiyq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy. Qalada oqýshylar onlain oqýǵa kóshirildi.
28 qarasha kúni tańerteń qalada jergilikti aýqymdaǵy tótenshe jaǵdai jariialandy.
30 qarashada Ekibastuzǵa Premer-Ministr Álihan Smaiylov baryp, kináliler jaýapqa tartylatynyn aitty.
Apat sebebi retinde jylý jelileriniń tozýy, jylý ortalyǵy basshylyǵynyń nemqurailylyǵy men investitsiialardyń jetkiliksizdigi ataldy.
Memleket basshysynyń tapsyrmasy boiynsha Premer-Ministrdiń birinshi orynbasary Roman Skliar qalalyq jylý jelilerindegi apattyń saldaryn joiý jónindegi jumystar aiaqtalǵansha Ekibastuzda bolatyny habarlandy.
7 jeltoqsanda Prezident Qasym-Jomart Toqaev Ekibastuzdaǵy jóndeý jumystarynyń barysy týraly Premer-Ministrdiń baiandamasyn tyńdady.
8 jeltoqsanda Prezidenttiń qabyldaýynda bolǵan Pavlodar oblysynyń ákimi Asaiyn Baihanov jylý júielerin qalpyna keltirý jumystary 15 jeltoqsanǵa deiin aiaqtalatynyn aitty. Osy kúni Ekibastuz qalasynan tótenshe jaǵdai rejimi alyndy.
