Fermerler úshin jerdi jaldaý men jekemenshikke alýdyń esh aiyrmasy joq. Bul týraly Jer reformasy jónindegi komissiianyń 1-otyrysynda «Olja Agro» bas direktory Aidarbek Qojanazaruly aitty, dep habarlaidy QazAqparat.
«Búginde elimizde eńbek etetin aýyl sharýashylyǵy taýarlaryn óndirýshilerdiń qarasy kóp. Aýyl sharýashylyǵyn júrgizýdiń zamanýi ádisterin qoldanyp, onyń tiimdiligin arttyrýǵa tyrysqan fermerler de jeterlik. Biraq, jermen jumys isteý kerek. Tek sonda ǵana nátijege jetýge bolady. Qazaqstanda jer óte qunarly. Onyń mol ónim berýge múmkinshiligi jeterlik. Alaida, jerdiń áleýeti áli tolyq ashylǵan joq. Mysalǵa, Qazaqstan aýyl sharýashylyǵynyń JIÓ-degi úlesi 5 paiyz ǵana. Al bul kórsetkish Belarýsta 8, Ýkrainada 12, Ózbekstanda 30 paiyzdy quraidy. 1990 jyldary Qazaqstannyń aýyl sharýashylyǵy úlesi JIÓ-niń 34 paiyzyn quraǵan edi. Mundai jaittyń oryn alýynyń basty sebebi jerdiń utymsyz paidalanýy bolyp otyr», - dedi ol.
Sonymen qatar ol qazaqstandyqtarǵa jerdi jekemenshikke berý máselesine qatysty oiymen bólisti.
«Bul erekshe jan-jaqty qarastyrýdy qajet etetin mańyzdy másele. Sondyqtan sheshim qabyldaýda asyǵystyq tanytpaǵan jón. Kásipkerler jaýapkershilikti óz moinyna alýdy úirenýi qajet. Jekemenshikke jer alǵan kásipkerler qol qýsyryp otyrmai, el men halyqtyń igiligi úshin jumys isteýi kerektigin, jerdiń áleýetin barynsha ashý úshin aianbai ter tógý kerek ekenin jiti túsinýi tiis. Jalpy alǵanda aýyl sharýashylyǵy jerlerin berýdiń eń tiimdi ári pármendi is-sharasy - uzaqmerzimdi jalǵa usyný. Sebebi, jerdi paidalanyp júrgen fermerler úshin ony uzaqmerzimdi jalǵa alý men jekemenshikke alýdyń esh airmashylyǵy joq», - dedi Aidarbek Qojanazaruly.
