فەرمەرلەر ٷشٸن جەردٸ جالداۋ مەن جەكەمەنشٸككە الۋدىڭ ەش ايىرماسى جوق. بۇل تۋرالى جەر رەفورماسى جٶنٸندەگٸ كوميسسييانىڭ 1-وتىرىسىندا «ولجا اگرو» باس ديرەكتورى ايداربەك قوجانازارۇلى ايتتى, دەپ حابارلايدى قازاقپارات.
«بٷگٸندە ەلٸمٸزدە ەڭبەك ەتەتٸن اۋىل شارۋاشىلىعى تاۋارلارىن ٶندٸرۋشٸلەردٸڭ قاراسى كٶپ. اۋىل شارۋاشىلىعىن جٷرگٸزۋدٸڭ زامانۋي ەدٸستەرٸن قولدانىپ, ونىڭ تيٸمدٸلٸگٸن ارتتىرۋعا تىرىسقان فەرمەرلەر دە جەتەرلٸك. بٸراق, جەرمەن جۇمىس ٸستەۋ كەرەك. تەك سوندا عانا نەتيجەگە جەتۋگە بولادى. قازاقستاندا جەر ٶتە قۇنارلى. ونىڭ مول ٶنٸم بەرۋگە مٷمكٸنشٸلٸگٸ جەتەرلٸك. الايدا, جەردٸڭ ەلەۋەتٸ ەلٸ تولىق اشىلعان جوق. مىسالعا, قازاقستان اۋىل شارۋاشىلىعىنىڭ جٸٶ-دەگٸ ٷلەسٸ 5 پايىز عانا. ال بۇل كٶرسەتكٸش بەلارۋستا 8, ۋكراينادا 12, ٶزبەكستاندا 30 پايىزدى قۇرايدى. 1990 جىلدارى قازاقستاننىڭ اۋىل شارۋاشىلىعى ٷلەسٸ جٸٶ-نٸڭ 34 پايىزىن قۇراعان ەدٸ. مۇنداي جايتتىڭ ورىن الۋىنىڭ باستى سەبەبٸ جەردٸڭ ۇتىمسىز پايدالانۋى بولىپ وتىر», - دەدٸ ول.
سونىمەن قاتار ول قازاقستاندىقتارعا جەردٸ جەكەمەنشٸككە بەرۋ مەسەلەسٸنە قاتىستى ويىمەن بٶلٸستٸ.
«بۇل ەرەكشە جان-جاقتى قاراستىرۋدى قاجەت ەتەتٸن ماڭىزدى مەسەلە. سوندىقتان شەشٸم قابىلداۋدا اسىعىستىق تانىتپاعان جٶن. كەسٸپكەرلەر جاۋاپكەرشٸلٸكتٸ ٶز موينىنا الۋدى ٷيرەنۋٸ قاجەت. جەكەمەنشٸككە جەر العان كەسٸپكەرلەر قول قۋسىرىپ وتىرماي, ەل مەن حالىقتىڭ يگٸلٸگٸ ٷشٸن جۇمىس ٸستەۋٸ كەرەكتٸگٸن, جەردٸڭ ەلەۋەتٸن بارىنشا اشۋ ٷشٸن ايانباي تەر تٶگۋ كەرەك ەكەنٸن جٸتٸ تٷسٸنۋٸ تيٸس. جالپى العاندا اۋىل شارۋاشىلىعى جەرلەرٸن بەرۋدٸڭ ەڭ تيٸمدٸ ەرٸ پەرمەندٸ ٸس-شاراسى - ۇزاقمەرزٸمدٸ جالعا ۇسىنۋ. سەبەبٸ, جەردٸ پايدالانىپ جٷرگەن فەرمەرلەر ٷشٸن ونى ۇزاقمەرزٸمدٸ جالعا الۋ مەن جەكەمەنشٸككە الۋدىڭ ەش ايرماشىلىعى جوق», - دەدٸ ايداربەك قوجانازارۇلى.
