Fermerler egis alqaptaryn ylǵaldyń jetispeýshiliginen biyl 15 sáýirge deiin onlain rejimde saqtandyra alady. Bul týraly Aýyl sharýashylyǵy ministrliginen málim boldy, dep habarlaidy "Ult aqparat".
«Sarapshylar biyl elimizdiń kóptegen óńirlerinde qurǵaqshylyq bolýy múmkin ekenin aityp otyr. Kóktemniń sońy men jaz aiynyń basyndaǵy topyraq ylǵalynyń jetispeýshiligi ekken eginniń tez kóterilýine kedergi bolady. Sondyqtan, qurǵaqshylyqtan saqtandyrý – ósimdik sharýashylyǵymen ainalysatyndardy qoldaýdyń mańyzdy sharalarynyń biri. 2020 jyldyń basynan beri ósimdik sharýashylyǵyndaǵy saqtandyrý erikti túrde júrgizilip keledi. Endi fermerler óz táýekelderin qanshalyqty tómendetý kerektigin ózderi sheshedi. Óz biznesin saqtandyrǵan egin sharýashylyǵymen ainalysatyndarǵa memleket qoldaý kórsetedi. Atap aitqanda, saqtandyrý polisi qunynyń 50 paiyzy sýbsidiia retinde tólenedi», - delingen habarlamada.
Eń bastysy – «Agroinsurance» servistik júiesi ornalasqan www.qoldau.kz platformasyna elektrondy tsifrlyq qoltańbanyń (ETsQ) kómegimen tirkelý kerek. Osylaisha, fermerler ekken eginin saqtandyrý úshin alqaptardy, kompaniiany, saqtandyrý somasyn tańdaýǵa, sondai-aq kún saiyn platformadaǵy jeke kabineti arqyly topyraqtaǵy ylǵal deńgeiin qadaǵalaýǵa múmkindik alady.
Saqtandyrý jaǵdaiyn anyqtaýda adami faktor alynyp tastalǵany da úlken mańyzǵa ie. Saqtandyrý jaǵdaiy týyndaǵan faktini spýtniktik derekterge súiene otyryp, aqparattyq júie aiqyndaidy. Bul – saqtandyrý tólemderi mehanizminiń obektivtiligi men ashyqtyǵyn qamtamasyz etedi.
Ylǵal tapshylyǵynan saqtandyrý birneshe kezeńge bólinedi. Birinshi kezeń - 15 mamyrdan 14 maýsymǵa deiin, ekinshi kezeń - 15 maýsymnan 14 shildege deiin jáne úshinshi kezeń - 15 shildeden 14 tamyzǵa deiingi aralyqty qamtidy.
Osyǵan bailanysty, fermerler alqaptardy qandai kezeńder boiynsha saqtandyratynyn ózderi tańdaidy. Monitoring júiesinde ár kezeń boiynsha saqtandyrý jaǵdaiy iske qosylatyn óz triggerleri qoiylǵan. Qurǵaqshylyqtan saqtandyrý tarifi saqtandyrý somasynyń 3,2 - 4,8%-yn quraidy. Al ylǵaldyń artyq bolýynan saqtandyrǵanda 3,2%-y sheginde belgilengen.
Saqtandyrý somasyn eseptegende fermer egis alqabynyń bir gektaryna saqtandyrý somasyn ózi anyqtaidy. Ol – 40 myńnan 80 myń teńgege deiin. Sodan keiin saqtandyrý kompaniiasyn tańdaidy jáne saqtandyrý qunynyń 50%-yn tóleidi. Qalǵan somany Aýyl sharýashylyǵyn qarjylai qoldaý qory tóleidi.
Saqtandyrý shartyna sáikes, saqtandyrý jaǵdaiy týyndaǵan sátten bastap 15 jumys kúni ishinde tólem jasalady.
