AQSh Federaldy tergeý biýrosy (FBR) 6 qańtardaǵy tártipsizdiktiń artynda shetel qarjysynyń bar-joǵyn tergeý ústinde, dep habarlady NBC telearnasy. Arna tilshileri bul aqparatty eki adamnan alǵan. Biri – FBR-diń qazirgi qyzmetkeri, biri – burynǵy qyzmetkeri.
FBR 6 qańtardaǵy oqiǵaǵa qatysy bar azamattarǵa bitkoin túrinde qarjy aýdarylǵanyna nazar aýdarǵan. Kapitoliidi basyp alý isi boiynsha kúdikti sanalatyn adamdardyń esep-shotyna bitkoin túrinde 500 myń dollar aýdarylǵan.
Telearna habarynda bul qarjy operatsiiasynyń artynda Frantsiia azamaty turǵan bolýy múmkin ekeni aitylady. Qarjy tólemderin kriptovaliýtamen aqsha aýdarýdy saraptaýshy mamandar qujatqa túsirgen.
6 qańtar kúni prezident sailaýy nátijesin bekitý maqsatymen Kongrestiń qos palatasy ortaq otyrys ótkizýi qajet bolǵan. Sol kúni AQSh-tyń qazirgi prezidenti Donald Tramp Aq úi janynda jaqtastarymen miting ótkizip, sailaý nátijesin moiyndamaitynyn málimdegen. Osydan keiin mitingshiler Kongress otyrysy bastalǵan Kapitoliige jol tartyp, ǵimaratty basyp alǵan. Oqiǵa saldarynan bes adamnyń qaitys bolǵany habarlandy.
