2-shi Dúniejúzilik soǵys kezinde Germaniia kontslagerlerinde tutqynda bolǵan 9 qazaqstandyq GFR tarapynan 2500 evrodan ótemaqy aldy, jalpy 13 qazaqstandyqtyń qujaty joldandy. Bul týraly búgin Almatydaǵy QR Prezidenti arhivinde ótken tarihi-qujattyq kórme barysynda QazAqparat tilshisine atalǵan arhivtiń bas sarapshysy Jylgeldinov Muhammed aityp berdi.
«2015 jyldyń aqpan aiynan bastap, QR Prezidentiniń arhivi «2-shi Dúniejúzilik soǵystyń qazaqstandyq áskeri tutqyndary: derekter, ádebietter, málimetter» atty baza jasaqtaý jobasyn júzege asyra bastady. Osy joba negizinde tutkyn.kz saity jasalyp, oǵan qamaýda bolǵan 35 myńnan asa qazaqstandyq týraly málimetter jariialandy. Jumystar áli de jalǵasyp jatyr. Osy joba aiasynda Germaniia Federativtik Respýblikasy jariialaǵan ótemaqyny 9 qazaqstandyq aldy. Naqtyraq aitqanda, 2015 jyldyń qyrkúiek aiynan bastap, GFR úkimeti burynǵy tutqynda bolǵan keńestik áskerilerge 2500 evro kóleminde ótemaqy tóleý týraly sheshim shyǵarǵan. Osy joba aiasynda bizdiń arhiv qazir kózi tiri 12-13 adamnyń qujattaryn jinastyryp jiberdi. Solardyń ishinde byltyrdan beri 2016-2017 jylǵy esep boiynsha, 9 adam Germaniia tarapynan 2500 eýrodan ótemaqy aldy», - dedi M.Jylgeldinov.
Sarapshynyń aitýynsha, qazirgi ýaqytta tutqynda bolǵan qazaqstandyqtardyń ótemaqy alý jobasyna QR Densaýlyq saqtaý jáne áleýmettik damý ministrligi de qosylyp jatyr.
«Vedomstvo ár oblystan áskeriler boiynsha aqparattar jinastyrýda. Biraq, Germaniiaǵa qujattardy joldap otyrǵan Prezident arhivi bolǵandyqtan málimetter osynda jiberiledi de, biz óz tarapymyzdan tekserip, Germaniiaǵa joldaimyz. Germaniiada da tekseriledi. Olarda kontsentratsiialyq lagerlerde bolǵandardyń tizimderi saqtalǵan. Sol jerde sáikestendiriledi. Eger barlyǵy anyqtalsa, onda 1 - 1,5 aidyń kóleminde ótemeqasyn alady», - dedi QR Prezidenti arhiviniń bas sarapshysy.
Germaniia tarapynan jasalyp jatqan bul joba 2017 jyldyń qyrkúiek aiynda aiaqtalatynyn eskertken maman áli de ýaqyt bar ekenin aitty.
«Biz áli de habarlap, osyndai joba júzege asyrylyp jatqanyn aityp jatyrmyz. Kózi tiri qazaqstandyq áskeri tutqyn bolsa, kerek qujattaryn jiberip, bizge habarlassa, Germaniiaǵa tezirek jiberip, ótemaqy alýyna múmkindik jasalady», - dedi ol.
