Foto: QR Mádeniet jáne aqparat ministrliginiń baspasóz qyzmeti
Kórnekti aqyn, memleket jáne qoǵam qairatkeri, Qazaqstannyń Halyq jazýshysy Fariza Ońǵarsynovanyń QR Ulttyq arhivindegi jeke qory taǵy da qundy qoljazbalarmen tolyqty. Bul týraly QR Mádeniet jáne aqparat ministrligi málimdedi, dep habarlaidy Ult.kz.
Aqynnyń uly Almas Ońǵarsynov anasynyń arhivtik qujattaryn óz qolymen tabystap, bolashaq urpaqqa tól muranyń tolyq jetýi men ult igiligine ainalýyna múddeli ekenin jetkizdi.
«Arhivke tapsyrylǵan qujattar 50-60-70 jyldardaǵy anamnyń óz qolymen jazǵan túpnusqa qoljazbalardan turady. Qazirgi kezde 50-ge jýyq kitaby jaryq kórgeni belgili. Anam barlyq shyǵarmasyn jazý mashinkasymen emes qolmen jazyp, baspaǵa usynatyn. Arhivke tapsyrylǵan qoljazbalar arasynda «Shilde», «Daýa» siiaqty taǵy da basqa kitaptardyń túpnusqalary bar. Ótken jyly 85 jyldyq mereitoi aiasynda da 50-ge jýyq murany tapsyrǵanbyz. Aqynnyń ómir joly men eńbegine qatysty qujattardy jinaqtap, kezeń-kezeńimen arhivke ótkizip, qordy tolyqtyryp otyrmyz. Bul dúnieler ǵalymdar, stýdentter jáne oily oqyrmandar úshin qundy bolaryna senemin», – dedi Almas Ońǵarsynov.
Bul joly Almaty qalasynan Ulttyq arhivke tórt qorap qujattar jetkizilgen. Onyń ishinde kitaptar, gazet-jýrnaldarǵa arnalǵan túpnusqa qoljazbalar, basylym betterinde jaryq kórgen shyǵarmalar, aýdarmalar, tulǵalar týraly materialdar, oi-tolǵamdar, jas aqyn-jazýshylardyń aqynǵa jazǵan hattary jáne ózge de qundy jazba muralar bar.
Aita keteiik, ótken jyly Fariza Ońǵarsynovanyń týǵanyna 85 jyl tolýyna orai Ulttyq arhivte aqynnyń jeke qory ashyldy. Onda aqynnyń óz qolymen jazǵan otbasylyq shejiresi men ómirbaiany, «Kógershinderim» óleńder jinaǵynan qoljazbasy, Muqaǵali Maqataevtyń 60 jyldyǵynda sóilegen sózi, notalary, buryn-sondy jariialanbaǵan fotosýretteri jáne hattary saqtaýly.
