فوتو: قر مەدەنيەت جەنە اقپارات مينيسترلٸگٸنٸڭ باسپاسٶز قىزمەتٸ
كٶرنەكتٸ اقىن, مەملەكەت جەنە قوعام قايراتكەرٸ, قازاقستاننىڭ حالىق جازۋشىسى فاريزا وڭعارسىنوۆانىڭ قر ۇلتتىق ارحيۆٸندەگٸ جەكە قورى تاعى دا قۇندى قولجازبالارمەن تولىقتى. بۇل تۋرالى قر مەدەنيەت جەنە اقپارات مينيسترلٸگٸ مەلٸمدەدٸ, دەپ حابارلايدى Ult.kz.
اقىننىڭ ۇلى الماس وڭعارسىنوۆ اناسىنىڭ ارحيۆتٸك قۇجاتتارىن ٶز قولىمەن تابىستاپ, بولاشاق ۇرپاققا تٶل مۇرانىڭ تولىق جەتۋٸ مەن ۇلت يگٸلٸگٸنە اينالۋىنا مٷددەلٸ ەكەنٸن جەتكٸزدٸ.
«ارحيۆكە تاپسىرىلعان قۇجاتتار 50-60-70 جىلدارداعى انامنىڭ ٶز قولىمەن جازعان تٷپنۇسقا قولجازبالاردان تۇرادى. قازٸرگٸ كەزدە 50-گە جۋىق كٸتابى جارىق كٶرگەنٸ بەلگٸلٸ. انام بارلىق شىعارماسىن جازۋ ماشينكاسىمەن ەمەس قولمەن جازىپ, باسپاعا ۇسىناتىن. ارحيۆكە تاپسىرىلعان قولجازبالار اراسىندا «شٸلدە», «داۋا» سيياقتى تاعى دا باسقا كٸتاپتاردىڭ تٷپنۇسقالارى بار. ٶتكەن جىلى 85 جىلدىق مەرەيتوي اياسىندا دا 50-گە جۋىق مۇرانى تاپسىرعانبىز. اقىننىڭ ٶمٸر جولى مەن ەڭبەگٸنە قاتىستى قۇجاتتاردى جيناقتاپ, كەزەڭ-كەزەڭٸمەن ارحيۆكە ٶتكٸزٸپ, قوردى تولىقتىرىپ وتىرمىز. بۇل دٷنيەلەر عالىمدار, ستۋدەنتتەر جەنە ويلى وقىرماندار ٷشٸن قۇندى بولارىنا سەنەمٸن», – دەدٸ الماس وڭعارسىنوۆ.
بۇل جولى الماتى قالاسىنان ۇلتتىق ارحيۆكە تٶرت قوراپ قۇجاتتار جەتكٸزٸلگەن. ونىڭ ٸشٸندە كٸتاپتار, گازەت-جۋرنالدارعا ارنالعان تٷپنۇسقا قولجازبالار, باسىلىم بەتتەرٸندە جارىق كٶرگەن شىعارمالار, اۋدارمالار, تۇلعالار تۋرالى ماتەريالدار, وي-تولعامدار, جاس اقىن-جازۋشىلاردىڭ اقىنعا جازعان حاتتارى جەنە ٶزگە دە قۇندى جازبا مۇرالار بار.
ايتا كەتەيٸك, ٶتكەن جىلى فاريزا وڭعارسىنوۆانىڭ تۋعانىنا 85 جىل تولۋىنا وراي ۇلتتىق ارحيۆتە اقىننىڭ جەكە قورى اشىلدى. وندا اقىننىڭ ٶز قولىمەن جازعان وتباسىلىق شەجٸرەسٸ مەن ٶمٸربايانى, «كٶگەرشٸندەرٸم» ٶلەڭدەر جيناعىنان قولجازباسى, مۇقاعالي ماقاتاەۆتىڭ 60 جىلدىعىندا سٶيلەگەن سٶزٸ, نوتالارى, بۇرىن-سوندى جارييالانباعان فوتوسۋرەتتەرٸ جەنە حاتتارى ساقتاۋلى.
