AQSh kásipkeri Ilon Masktyń SpaceX jekemenshik korporatsiiasy ázirlegen Falcon 9 zymyran-tasyǵyshy Jer orbitasyna ǵalamdyq internet jelisin qurýǵa arnalǵan 60 shaǵyn Starlink jasandy jer serigin shyǵardy. Bul týraly kompaniia Twitter áleýmettik jelisindegi paraqshasynda habarlady.
Eki bólikten turatyn Falcon 9 AQSh-tyń Kanaveral múisindegi ǵarysh ailaǵynan seisenbige qaraǵan túni ushyrylǵannan keiin arada segiz jarym minýt ótkende zymyrannyń osymen tórtinshi márte paidalanylǵan birinshi bóligi avtomatty túrde Atlant muhitynyń AQSh-tyń Ońtústik Karolina shtatyna jaqyn tusyndaǵy teńiz betindegi Of Course I Still Love You platformasyna ózdiginen qonǵan.
Falcon 9 zymyrany Starlink jasandy jer serikterin 290 kilometr biiktegi Jer orbitasyna jetkizdi. SpaceX injenerleri olardyń qalai jumys istep turǵanyn tekserip bolǵannan keiin jer serikterindegi iondy qozǵaltqyshtar iske qosylyp, taǵy da birtalai biikke kóteriledi.
Starlink jobasy aiasynda jasandy jer serikteriniń osymen úshinshi toby ǵaryshqa shyǵaryldy. Alǵashqy 60-y byltyr mamyrdyń sońynda, ekinshi toby – qarashanyń aiaǵynda ushyrylǵan.
SpaceX kompaniiasynyń jospary boiynsha, 12 myń jasandy jer seriginen turatyn ǵalamdyq júie tolyq iske qosylǵannan keiin jer sharynyń kez kelgen túkpirinen keń jolaqty internet bailanysyna qosylýǵa múmkindik týmaq. Jobany júzege asyrý úshin investitsiianyń jalpy quny 10 milliard dollar dep baǵalanǵan.
