Jeltoqsan aiynda 267 million Facebook qoldanýshysynyń deregi internette jariialanyp ketti. Comparitech saitynyń jazýynsha, negizinen AQSh-taǵy áleýmettik jeli qoldanýshylarynyń derekteri urlanǵan.
Sarapshylardyń aitýynsha, internette qoldanýshylardyń aty, Facebook ID jáne telefon nómirleri jariialanǵan. Comparitech saitynyń pikirinshe, hakerler bul derekterdi spam jiberý úshin qoldanýy múmkin. Sarapshylar derekterdiń urlanýyna Vetnam hakerleriniń qatysy bar dep boljaidy. Olar aqparatty hakerler forýmyna salǵan bolýy múmkin.
Facebook basshylyǵy oqiǵanyń jai-japsaryn zerttep jatyr. Kompaniia ókili bul derekter Facebook-tyń aqparat qaýipsizdigi salasynda saiasaty ózgergenge deiin urlanǵan bolýy múmkin deidi.
2018 jyldyń basynda jýrnalister britandyq Cambridge Analytica kompaniiasyn AQSh-ta Donald Tramptyń sailaýaldy kampaniiasy jalǵasyp jatqan kezde Facebook qoldanýshylarynyń derekterin zańsyz paidalandy dep aiyptaǵan. 2016 jyly Shveitsariianyń Das Magazine jýrnaly bul derekter álemdegi túrli sailaý nátijelerine (onyń ishinde Ulybritaniiadaǵy Brekzit boiynsha daýys berý de bar) yqpal etý úshin paidalanylǵan bolýy múmkin dep jazdy.
Bul daýdan keiin kompaniia basshysy Mark Tsýkerbergtiń AQSh kongresindegi tyńdaýda jaýap berýine týra keldi. Kompaniia derekterdi óńdeý saiasatyn qatańdatýdy, adamdardyń jeke deregin qorǵaý saiasatyn ózgertetinin málimdegen. Cambridge Analytica bul daýdan keiin jumysyn toqtatty.
