Ázerbaijan, Izrail, Qazaqstan, Estoniia jáne EYDU sarapshylary pandemiia jaǵdaiynda memlekettik basqarýdyń tiimdiligi men memlekettik qyzmetterdiń sapasyn arttyrýǵa baǵyttalǵan tsifrlyq sheshimderdi usyndy, dep habarlaidy "Ult aqparat".
Astanadaǵy memlekettik qyzmet haby sessiiasy Halyqaralyq ákimshilik ǵylymdary institýtynyń (IIAS, Belgiia) onlain-konferentsiiasy aiasynda 20-dan astam eldiń ókilderi qatysýymen ótti.
Astana memlekettik qyzmet haby Basqarýshy komitetiniń tóraǵasy Álihan Baimenov sessiiany asha otyryp, karantin, áleýmettik qashyqtyq jáne qashyqtyqtan jumys isteý zamanaýi aqparattyq tehnologiialardy qoldanýdy jyldamdatqanyn atap ótti.
«Sovid-19 pandemiiasy, sonymen birge, senimniń áleýmettik qundylyq qana emes, tiimdi ákimshilik kapital retinde de mańyzdylyǵyn kezekti márte kórsetti. Sondyqtan innovatsiialyq tehnologiialardyń ashyq jáne taza sheshimder qabyldaýǵa jaǵdai jasaýy, asyra paidalanýshylyqty boldyrmaý, sol arqyly azamattardyń quqyǵy men bostandyqtaryn qamtamasyz etýi mańyzdy», - dedi spiker.
Sondai-aq, ol zamanaýi tehnologiialardy qoldaný ǵana emes, jańa jaǵdaida azamattardyń quqyqtary men bostandyqtaryn qorǵaý máselelerin qamtityn tájiribe almasýdyń mańyzdylyǵyn atap ótti.
Óz quttyqtaý sózinde Halyqaralyq ákimshilik ǵylymdary institýty bas direktory Sofian Sahraýi qurylǵanyna biyl 90 jyl tolǵan IIAS tuǵyrnamasynda Habtyń sessiia ótkizgeni jáne áriptestigi úshin alǵys bildirdi. Ol yntymaqtastyqty memlekettik basqarý salasynda, onyń ishinde zertteý jobalary boiynsha damytýǵa qyzyǵýshylyq tanytty.
Otyrys barysynda Ázirbaijan, Izrail, Qazaqstan, Estoniia jáne EYDU ókilderi óz tájiribelerimen bólisti.
Atap aitqanda, Ázirbaijan Elektrondyq úkimetin damytý ortalyǵy direktory Fariz Djafar azamattardy jaqyn mańdaǵy yqtimal COVID-19 tasymaldaýshylary týraly eskertetin mobildi e-Tabib qosymshasy jáne «e-mask» respiratory siiaqty innovatsiialyq sheshimdermen tanystyrdy. Ol karantin jaǵdaiynda azamattardyń qozǵalysyn onlain tirkeitin júiege tolyǵyraq toqtaldy. Bul joba Habtyń Virtýaldy aliansy arqyly qatysýshy-elder arasynda taratylyp, Túrkistan qalasy ákimdigi ázirbaijandyq tájiribeni qoldanyp, osyndai onlain-júieni jasady.
Estoniia elektrondy basqarý akademiiasy direktorynyń orynbasary Hannes Astok óz sózinde jańa jaǵdailarda kóptegen memlekettik qyzmetter ońtailandyrylǵanyn atap ótti. Kún saiyn 1,1 millionnan astam sandyq aýtentifikatsiia men qol qoiý úkimettik, kommertsiialyq jáne jeke operatsiialarda qoldanylady.
Sonymen qatar, «Shekarasyz innovatsiialar» uiymynyń (IWB, Izrail) negizin qalaýshysy jáne basqarýshy direktory Benni Shlik Qazaqstannyń Izraildegi Elshiligi qoldaýymen sessiiaǵa qatysty. Ol 2019 jyly Izrail úkimeti ár túrli saladaǵy innovatsiialyq sheshimderdi ázirleý jáne zertteý úshin 480 million AQSh dollary kóleminde 1650 jobany investitsiialaǵanyn atap ótti. Ol COVID-19 tsifrly transformatsiiany jyldamdatqanyn, bul memlekettik júieni qaita quryp, ideialardy ilgerletýde jańa múmkindikterdi kórýge jol ashqanyn jetkizdi.
«Deep Knowledge Group» reitingi boiynsha Izrail koronavirýstyq pandemiia jaǵdaiyndaǵy qaýipsiz elderdiń alǵashqy úshtigine kiredi. Densaýlyq saqtaý jáne qoǵamdyq qaýipsizdikti qamtamasyz etýde tsifrly sheshimderdi qoldaný nátijesinde tek Shveitsariia men Germaniiaǵa jol beredi.
«Zerde» Ulttyq infokommýnikatsiia Holdingi halyqaralyq yntymaqtastyq bólimi bastyǵy Aiajan Muqanova az ýaqyt ishinde Qazaqstan Úkimetimen birlesip IT-kompaniialar 53-ten astam jobany jasaǵanyn aitty. Tótenshe jaǵdai kezinde azamattarǵa 13,8 millionnan astam memlekettik elektrondy qyzmet kórsetilgenin aitty.
EYDU memlekettik basqarý direktoraty Tsifrlyq úkimet jáne derekter bólimi saiasat máseleleri boiynsha analitigi Joao Vaskonselos COVID-19 saldarynan keiingi qalpyna keltirý isine tsifrlyq memlekettik sektor serpin beretinin atap ótti. Sonymen qatar, tsifrlyq úkimettiń damý deńgeii ásirese qazirgi tańda memlekettik sektordyń negizgi kórsetkishi bola túsetinin atap ótti.
Sessiiaǵa álemniń 20-dan astam eli memlekettik qyzmetkerleri, halyqaralyq sarapshylar, ǵalymdar – jalpy 100-den astam adam qatysty.
