«Aktobe, dyshi!» eriktiler qozǵalysynyń uiymdastyrýshysy, eko-ambassador Evgenii Lazarchýk 10 shilde kúni Úkimettiń keńeitilgen otyrysynda Prezident aitqan mektepterde ekologiialyq bilim berý qajettigin qoldady, dep habarlaidy QazAqparat.
Ol óziniń atalǵan qozǵalysy Aqtóbedegi mektepterde sabaqtar ótkizip júrgenin mysal retinde keltirdi.
«Biz balalarmen birge emen kóshetin otyrǵyzyp, olarǵa aǵashtyń paidasy, aýa sapasy, olarsyz jer shólge ainalyp, ylǵal joǵalatynyn aityp júrmiz. Balalarǵa bul óte qyzyq, olar qalada aǵashtardy jiirek kórgisi keletinderin aitty. Sondyqtan, balalarǵa bala kezinen qoqys jinaý daǵdylaryn qalyptastyryp, olarǵa ekologiia máselelerin aityp júrý kerek. Máselen, itbalyqtar balyq aýlaityn torǵa qalai oralyp qalatyny, qustar plastikti jutyp, ólip qalatyny. Mundai mysaldar kóp qoi. Olarǵa kózben kórsetý kerek. Eger bala osyny bir-eki ret kórse, ol qaǵazdy eshqashan jerge tastamaityn bolady. Qazir balalarǵa osyndai sabaqtar ótkizetin eriktiler uiymdary paida boldy. Mysaly, Temirtaýda oqýshylarǵa arnap bos bótelkeler tastaityn arnaiy jáshikter qoiylyp jatyr, iaǵni osy arqyly qoqysty jeke jinaýǵa úiretedi. Biz ekologiia departamentimen birge qaldyqtar tastalatyn jerlerdi aralaimyz, biraq barlyǵyn qoqys jinaýǵa tartý kerek», - dedi Evgenii Lazarchýk.
Ol osy máseleni sheshý úshin mynadai sharalardy usyndy.
«Meniń oiymsha, tabiǵatty qorǵaý politsiiasyna kóp qyzmetkerlerdi tartyp, ákimshilik aiyppuldardy qataitý kerek, ruqsat etilmegen jerge qoqys tastaǵany úshin jaýapkershilikke kóbirek tartyp, qatty turmystyq qaldyqtardy turaqty shyǵarýdy jolǵa qoiý qajet. Aqtóbede bul burynnan kele jatqan másele. Qoqys poligonyndaǵy máseleler óte kóp, plastikterdi qaita óńdeýdiń ornyna kómip tastaidy. Bizde plastikterdi de, shynylardy da qaita óńdeitin zaýyttar joq. Mysaly, Eýropada adamdar aqshaǵa bótelke, paketterdi ótkizip, taýarlarǵa jeńildik alady. Olar osy arqyly ekologiiany jaqsartýǵa kómektesip jatqanyn túsinedi. Batysta qaitalama shikizet qabyldaityn arnaiy avtomattar bar. Álemde mundai innovatsiialar óte kóp, osylardy bizdiń elge de engizý kerek. Elimizdegi ekologiialyq jaǵdai máz emes. Biz qazir respýblikada 10 jylǵa elde aǵash kesýge moratorii engizý týraly petitsiia jinap jatyrmyz. Sebebi, jaǵdai óte qiyn. Bir jarym aptanyń ishinde petitsiiaǵa 5,5 myń adam qol qoidy. Bastamamyzdy jalǵastyryp, Prezidentten aǵash kesýdi toqtatýdy ótinemiz, óitkeni elde shóleittený júrip jatyr. Biz ylǵaldy joǵaltamyz, sonyń saldarynan ózender qurǵap, aýadaǵy otteginiń mólsheri azaiyp, shań aralas daýyldar bolyp jatyr. Munyń bári aǵashtardyń bolmaýynan», - dep atap ótti eko-belsendi.
