Everest shyńynda shamamen 30 jyl boiy jatqan «Jasyl etik» (Green Boots) degen atpen belgili alpinistiń kim ekeni resmi túrde anyqtaldy. DNQ saraptamasynyń nátijesi boiynsha onyń 1996 jyly Everestke kóterilý kezinde qaza tapqan úndistandyq alpinist Dordje Morýp ekeni rastaldy, dep habarlaidy ult.kz Moi gorod-qa silteme jasap.
Úndi-Tibet shekara politsiiasynyń málimetinshe, Dordje Morýp qaiǵyly oqiǵa kezinde 47 jasta bolǵan. Biyl jazda onyń máiitin Everesttiń 8 myń metrden joǵary ornalasqan «ólim aimaǵynan» evakýatsiialaý josparlanyp otyr. Qazir bul kúrdeli operatsiiany oryndai alatyn mamandandyrylǵan kompaniia izdestirilýde.
Dordje Morýp 1996 jyldyń 10 mamyrynda Everesttiń soltústik baǵytymen kóterilgen alty adamdyq toptyń quramynda bolǵan. Shyńǵa jaqyndaǵanda alpinister qatty boranǵa tap bolyp, olardyń úsheýi keri qaitqan. Al Morýp eki serigimen birge jolyn jalǵastyryp, úsheýi de kóz jumǵan.
Qaýipti aýa raiy men biik taýdaǵy qutqarý jumystarynyń kúrdeliligine bailanysty onyń denesin tómenge túsirý múmkin bolmaǵan. Osy ýaqyt ishinde qar men muz máiitti jaqsy saqtap, «Jasyl etik» Everesttiń soltústik-shyǵys jotasymen kóteriletin alpinister úshin beiresmi baǵdarǵa ainaldy.
Kóp jyl boiy alpinistiń kim ekeni jóninde túrli boljam aitylyp, onyń denesi basqa úndistandyq alpinist Tsevang Paldjorǵa tiesili degen pikir keń taraǵan edi. Alaida DNQ saraptamasy bul daýǵa núkte qoiyp, máiittiń Dordje Morýpqa tiesili ekenin dáleldedi.
