Djon Hopkins ýniversitetiniń málimetteri boiynsha, álemde koronavirýs juqtyrǵandar sany 30 millionǵa jýyqtady, 941,3 myń adam qaitys boldy, dep habarlaidy BBC agenttigi.
Dúniejúzilik densaýlyq saqtaý uiymy (DDSU) Eýropadaǵy jaǵdaidyń indet qatty órshigen naýryzdaǵy jaǵdaidan áldeqaida aýyr ekenin málimdedi.
«Tek ótken aptanyń ózinde ǵana álemde virýsty juqtyrýdyń 300 jańa jaǵdaiy tirkeldi»,-dep málimdedi DDSU-nyń Eýropa boiynsha óńirlik direktory Hans Kliýge. Naýryz aiynyń sońynda Eýropada virýs juqtyrýdyń jańa jaǵdailary 26 475-ke jetti.
«Jaǵdai óte múshkil», - dedi Kliýge.
Eýropanyń kóptegen elinde qazir sońǵy birneshe aidaǵy eń joǵarǵy kórsetkishter tirkelýde.
Kliýgeniń sózinshe, virýstyń álem elderi arasynda taraý kórsetkishi de ósip keledi.
«Shildede aýrý juqtyrý kórsetkishi tómen bolatyn. Al qyrkúiektegi kórsetkishter bizge eskertý ispettes bolýy kerek edi»,-dedi ol.
Indettiń taraý kórsetkishi ósip otyrǵan elderdiń biri - Niderlandy. Bul el jaqynda Britaniianyń «qyzyl tizimine» endi. Qazir Niderlandydan keletinder 14 kúnge oqshaýlandyrylýy tiis.
Al Ispaniiada stýdentter kóshege shyǵyp, joǵary oqý oryndary men mektepterdegi qaýipsizdikti nyǵaitýdy talap etti. Naqtyraq aitqanda olar tazalyq standarttaryn jetildirip, ustazdardyń jeke qaýipsizdik qurylǵylarymen qamtamasyz etilýin talap etip otyr. Sońǵy táýlikterde bul elde koronavirýstan 239 adam qaitys boldy. Bul maýsym aiynan keiingi eń úlken kórsetkish. Aýrý júqtyrý jaǵdailary ásirese Madridte kóbeidi.
Frantsiiada kásipodaq uiymdarynyń ókilderi bas kótermek. Olar ekonomikamen bailanysty máselelerdi sheshý úshin úkimet tarapynan qolǵa alynyp otyrǵan sharalar jetkiliksiz dep esepteidi. Biliktiń boljamynsha, 2020 jyly 800 myńnan astam adam jumysynan aiyrylýy múmkin. Frantsiiada sońǵy táýlikterde COVID-19 juqtyrýdyń 10 myń jańa jaǵdaiy tirkelgen.
Germaniiada sońǵy 24 saǵatta virýs juqtyrǵandar sany biylǵy jyldyń sáýir aiynan bergi ýaqyttaǵy eń joǵarǵy kórsetkish bolyp otyr.
Angliianyń soltústik-shyǵysyndaǵy birqatar qalada karantinniń qosymsha sharalary engizilýde. Atalǵan óńir turǵyndary «áleýmettik sheńber» dep atalatyn aýmaqqa jatpaityn adamdarmen qarys-qatynas jasai almaidy nemese turǵyndardyń ózderimen bir úide turyp jatqan adamdarmen bailanysyna tyiym salynǵan.
Sonymen qatar dámhanalar men meiramhanalarda shekteý sharalary engizilgen. Iaǵni atalǵan oryndarda tamaqqa tapsyrysty tek sol jerde otyrǵan kezde ǵana bere alasyz. Oiyn-saýyq oryndary jumysyn tek túngi 22:00-ge deiin ǵana jalǵastyra alady.
