Koronavirýs juqtyrǵan qytailyq týrist Frantsiiada kóz jumdy. Bul Aziiadan tys jerdegi jańa koronavirýstan qaitys bolǵan alǵashqy adam, dep habarlaidy VVS News.
Frantsiianyń Densaýlyq saqtaý ministri Anes Býzinniń sózine qaraǵanda, Qytaidyń Hýbei provintsiiasynan kelgen 80 jastaǵy áiel koronavirýstyń qurbany bolǵan.
Býzinniń aitýynsha, qytai azamatshasy Frantsiiaǵa 16 qańtar kúni kelip, 25 qańtarda Parij emhanalarynyń birine karantinge jatqyzylǵan.
Buǵan deiin, koronavirýstan qurlyqtyq Qytai shekarasynyń syrtynda tek Gonkong, Filippin jáne Japoniiada ólim jaǵdailary tirkelgen edi.
Al, Qytaida virýs saldarynan 1500-den asa adam qaza tapty. Olardyń kópshiligi jańa koronavirýs oshaǵy – Hýbei provintsiiasynda tirkeldi.
Taǵy 2641 adam koronavirýs juqtyryp, Qytaida indetke shaldyqqandardyń jalpy sany 66 492-ge jetti.
Burynyraq Frantsiia elde resmi ataýy Covid-19 virýsyn juqtyrǵan 11 adam tirkelgenin habarlaǵan. Málimdeme jasalǵan sátte indet juqtyrǵan alty adam emhanada qaldy.
Býzinniń sózi boiynsha, kóz jumǵan áieldiń qyzy da koronavirýs juqtyrypty, biraq onyń jaǵdaiy jaqsaryp kele jatyr.
