28 qarasha kúni Eýropada koronavirýstan qaitys bolǵandar sany 400 myńnan asty. Pandemiia bastalǵaly segiz ai ótse, osy aralyqta Eýropada Covid aýrýynan 400 949 adamnyń ólimi tirkelgen. Bul týraly Aýrýdyń aldyn alý jáne qadaǵalaý jónindegi eýropalyq ortalyq habarlady. Koronavirýs infektsiiasyn juqtyryp qaitys bolǵandar jóninen kósh basynda Ulybritaniia (57 551), Italiia (53 677), Frantsiia (51 914), Ispaniia (44 668) jáne Resei (39 068) tur.
Virýs juqtyrǵandar sany 13 millionnan asqan AQSh-ta tek qarasha aiynyń ózinde 4 million Covid naýqasy anyqtalǵan. Aidyń aiaqtalýyna áli eki kún bar. Bul – qazan aiyndaǵy rekordtan eki ese joǵary kórsetkish. Elde ortasha eseppen kúnine 1,5 myńǵa jýyq adam koronavirýstan kóz jumyp jatyr. Qaitys bolǵandardyń jalpy sany 266 myńnan asyp qaldy. Aýrýhanaǵa jatqyzylǵandar sany alǵash ret 90 myńnan asty. Bul kóptegen shtatty shekteý sharalaryn kúsheitýge májbúrledi.
"Biz apatqa jaqyndap kelemiz" dedi CNN-ge Djordj Vashington ýniversitetiniń shaqyrylǵan professory Leana Ven. "AQSh-ta qaitys bolatyndardyń táýlik sany jýyq arady 2 myńnan, bálkim 3 myńnan, 4 myńnan asýy múmkin".
Reseidiń Sankt-Peterbýrg qalasynda jańa týǵan náresteniń áke de, sheshesi de koronavirýstan qaitys bolyp, otbasynan tutas aiyrylǵan. Jasandy tynys alý apparatyna qosylǵan áiel bosanǵan kúni kóz jumǵan. Al sábidiń ákesi odan úsh kún buryn qaitys bolǵan. Reseide indet bastalǵaly 2 million 249 myń adamnyń virýs juqtyrǵany rastalǵan. Onyń 39 myńnan astamy qaitys bolǵan, 1 million 746 myńy jazylyp shyqqan.
