Eýropada men AQSh-ta koronavirýs juqtyrýshylar sany rekordtan rekord jańartyp jatyr. Densaýlyq júiesine shamadan tys salmaq túsip jatqan elder virýsty toqtatý úshin kóptegen shekteýler engizip jatyr.
30 qazannan bastap Frantsiiada respýblikalyq deńgeide lokdaýn tártibi ornady. 65 millionǵa jýyq halyq úiinde otyrýǵa májbúr. Syrtqa asa mańyzdy qajettilik bolǵanda ǵana shyǵýǵa ruqsat. Virýs juqtyrǵandar sany búkil kontinent boiynsha artyp keledi: Eýropada kún saiyn 240 myńnan astam naýqas tirkelip otyr, al 14 elde aýrýhanaǵa jatqyzylǵandar sany rekord jańartyp jatyr.
Belgiia – lokdaýn jariialaǵan sońǵy eýropalyq memleket. Tártip 2 qarashadan bastap kúshine enedi. Sol kúni Germaniia jartylai lokdaýn tártibine ótedi. Bul týraly osy aptada habarlanǵan.
Times basylymy Ulybritaniia premer-ministri Boris Djonsonnyń kelesi aptada jańa sharalardy qabyldaý múmkindigin qarastyryp otyrǵanyn habarlady.
Resei prezidenti Vladimir Pýtin karantin engizbeitinin málimdedi. Elde virýs juqtyrǵandar sany rekord jańartyp otyr. Resei aýrýhanasyna túsip jatqan naýqastary sany artyp jatyr.
AQSh-ta meditsinalyq mekemelerge shamadan tys aýyr salmaq túsip jatyr. Virýs kún saiyn myńdaǵan adamnyń ólimine ákelip otyr. Al 3 qarashada elde prezident sailaýy ótpek. 30 qazan kúni 100 myń Covid naýqasy tirkelip, virýs juqtyrǵandar sany 9 millionnan asty. Bul – el halqynyń 3 paiyzy.
