UEFA Eýropa ligasy finalyna joldama alǵan eki komanda anyqtaldy, dep habarlaidy "Ult aqparat".
Alǵashqy jupta «Roma» (Italiia) men «Manchester Iýnaited» (Angliia) komandalary sheberlik baiqasty. Olardyń arasyndaǵy jeńimpaz birinshi kezdesýde-aq anyqtalyp qoidy deýge negiz bar. Aǵylshyn jerinde ótken oiynda «Manchester Iýnaited» qarsylasyn 6:2 esebimen oisyrata jeńgen bolatyn.
Búgingi oiynda italiandyq klýb sol ketken eseni qaitarýǵa tyrysty. Degenmen aǵylshyn fýtbolshylary oǵan múmkindik bere qoiǵan joq. Oiynnyń 39-minýtynda «Manchester Iýnaited» sapynan Edinson Kavani mergendik tanytty. Odan keiin «Roma» sapynan Edin Djeko 57, Brian Kristante 60-minýttarda qaqpany dál kódedi. Al 68-minýtta Edinson Kavani óziniń ekinshi golyn soǵyp, tarazy basyn teńestirdi. Nikola Zalevskii 83-minýtta «Romany» taǵy da alǵa shyǵardy. Kezdesýde alań ieleri 3:2 esebimen jeńdi. Alaida qos oiynnyń qorytyndysymen «Manchester Iýnaited» finalǵa joldama aldy.
«Arsenal» (Angliia) men «Viliarreal» (Ispaniia) komandalary taǵy bir joldamanyń iegerin anyqtady. Birinshi kezdesýde «Viliarreal» aǵylshyndyq klýbty 2:1 esebimen tize búktirdi.
Búgingi oiynda da tartysqa toly boldy. Dese de qarsylastar bir-biriniń qaqpasynan sańylaý taba alǵan joq. Kezdesý 0:0 esebimen teń aiaqtaldy. Finalǵa «Viliarreal» joldama aldy.
Final 26 mamyrda Polshanyń Gdansk qalasyndaǵy «Energa Gdansk» stadionynda ótkiziledi.
