ەۋروپا ليگاسى: فينالعا شىققان ەكٸ كوماندا انىقتالدى

UEFA ەۋروپا ليگاسى فينالىنا جولداما العان ەكٸ كوماندا انىقتالدى, دەپ حابارلايدى "ۇلت اقپارات".

العاشقى جۇپتا «روما» (يتالييا) مەن «مانچەستەر يۋنايتەد» (انگلييا) كوماندالارى شەبەرلٸك بايقاستى. ولاردىڭ اراسىنداعى جەڭٸمپاز بٸرٸنشٸ كەزدەسۋدە-اق انىقتالىپ قويدى دەۋگە نەگٸز بار. اعىلشىن جەرٸندە ٶتكەن ويىندا «مانچەستەر يۋنايتەد» قارسىلاسىن 6:2 ەسەبٸمەن ويسىراتا جەڭگەن بولاتىن.

بٷگٸنگٸ ويىندا يتالياندىق كلۋب سول كەتكەن ەسەنٸ قايتارۋعا تىرىستى. دەگەنمەن اعىلشىن فۋتبولشىلارى وعان مٷمكٸندٸك بەرە قويعان جوق. ويىننىڭ 39-مينۋتىندا «مانچەستەر يۋنايتەد» ساپىنان ەدينسون كاۆاني مەرگەندٸك تانىتتى. ودان كەيٸن «روما» ساپىنان ەدين دجەكو 57, بريان كريستانتە 60-مينۋتتاردا قاقپانى دەل كٶدەدٸ. ال 68-مينۋتتا ەدينسون كاۆاني ٶزٸنٸڭ ەكٸنشٸ گولىن سوعىپ, تارازى باسىن تەڭەستٸردٸ. نيكولا زالەۆسكيي 83-مينۋتتا «رومانى» تاعى دا العا شىعاردى. كەزدەسۋدە الاڭ يەلەرٸ 3:2 ەسەبٸمەن جەڭدٸ. الايدا قوس ويىننىڭ قورىتىندىسىمەن «مانچەستەر يۋنايتەد» فينالعا جولداما الدى.

«ارسەنال» (انگلييا) مەن «ۆيلياررەال» (يسپانييا) كوماندالارى تاعى بٸر جولدامانىڭ يەگەرٸن انىقتادى. بٸرٸنشٸ كەزدەسۋدە «ۆيلياررەال» اعىلشىندىق كلۋبتى 2:1 ەسەبٸمەن تٸزە بٷكتٸردٸ.

بٷگٸنگٸ ويىندا دا تارتىسقا تولى بولدى. دەسە دە قارسىلاستار بٸر-بٸرٸنٸڭ قاقپاسىنان ساڭىلاۋ تابا العان جوق. كەزدەسۋ 0:0 ەسەبٸمەن تەڭ اياقتالدى. فينالعا «ۆيلياررەال» جولداما الدى.

فينال 26 مامىردا پولشانىڭ گدانسك قالاسىنداعى «ەنەرگا گدانسك» ستاديونىندا ٶتكٸزٸلەدٸ.