Búgin «Astana Arenada» elordalyq «Astana» komandasy Serbiianyń «Partizan» komandasyn qabyldady, dep habarlaidy "Ult aqparat".
1-týrda «Manchester Iýnaitedten» utylǵan astanalyqtar búgin jeńiske jetý úshin baryn salatyny o bastan belgili edi. Alaida, oiyndaǵy alǵashqy goldy qonaqtardyń shabýylshysy Omar Sadyq 28-shi minýtta soqty.
«Astana» fýtbolshylary gol soǵý úshin qansha talpynǵanymen, partizandardyń qarymta shabýyldary qaýipti boldy. 73-minýtta sondai shabýyldardyń taǵy biri golmen aiaqtaldy. Bul joly da Omar Sadyq gol avtory boldy. Ol úshinshi ret te gol soǵyp edi, biraq ofsaidta turǵandyqtan, tóreshiler goldy esepke almady.
«Astana» jaǵdaidy retteý úshin barynsha shabýyldady. Stadionǵa kelgen jankúierler súiikti komandasynyń golyn 85-shi minýtqa deiin kútti. Kóp shabýyldyń birinde R. Sigýronsson gol soǵyp, esepti qysqartty. Oiyn 1:2 esebimen aiaqtaldy.
Eki oiynda da jeńiliske ushyraǵan «Astana» L tobynda 4-orynda qaldy. «Partizan» 4 upaimen keste basyna shyǵyp aldy.
