Búgin elordalyq «Astana» UEFA Eýropa ligasy toptyq kezeńindegi úshinshi oiynyn syrt alańda Gollandiianyń «AZ Alkmar» komandasyna qarsy ótkizdi, dep habarlaidy QazAqparat.
Oiyn barysynda alań ieleriniń basymdyǵy baiqalyp turdy. Olar alǵashqy minýttarda gol soǵý múmkindigin izdedi. Dese de elordalyq fýtbolshylar olarǵa laiyqty qarsylyq kórsetti. Oiynnyń 39-minýtynda qazaqstandyq klýbtyń qaqpasyna penalti belgilendi. Ony Teýn Koolmeiners múlt jibergen joq. Al 43-minýtta Miron Boadiý esepti ústedi.
Birinshi kezeńde «Astana» eki oiynshysyn almastyrýǵa májbúr boldy. Alǵan jaraqatyna bailanysty Nenad Erichti Aleksandr Mokin almastyrdy. Odan keiin qorǵaýshy Abzal Beisebekovtiń ornyna Antonio Rýkavinany shyǵardy.
Ekinshi kezeńde elordalyq fýtbolshylar gol soǵatyn birneshe múmkindikti paidalana alǵan joq. Alań ieleri oiyn tizginin óz qolynda ustaýǵa tyrysty. Al 77-minýtta gollandiialyq Kalvin Stengs «Astana» qaqpasyna taǵy bir gol soǵyp ketti. Al 83-minýtta Teýn Koolmeiners penaltiden óziniń ekinshi golyn soqsa, 85-minýtta Iýkinari Sýgavara mergendik tanytty. Alań ieleri qatarynan 90-minýtta Ýssama Idrissi qorytyndy esepti belgiledi.
Osylaisha «Astana» qarsylasynan 0:6 esebimen jeńilip qaldy.
Esterińizge sala ketelik, budan buryn «Astana» toptyq kezeńde eki oiyn ótkizip úlgerdi. Aldymen syrt alańda Angliianyń «Manchester iýnaited» klýbynan 0:1 esebimen jeńilse, odan keiin óz alańynda Serbiianyń «Partizanyna» 1:2 esebimen jol berdi.
Endi «Astana» 7 qarasha kúni búgingi qarsylasymen elordada kezdesedi.
