بٷگٸن ەلوردالىق «استانا» UEFA ەۋروپا ليگاسى توپتىق كەزەڭٸندەگٸ ٷشٸنشٸ ويىنىن سىرت الاڭدا گوللاندييانىڭ «از الكمار» كومانداسىنا قارسى ٶتكٸزدٸ, دەپ حابارلايدى قازاقپارات.
ويىن بارىسىندا الاڭ يەلەرٸنٸڭ باسىمدىعى بايقالىپ تۇردى. ولار العاشقى مينۋتتاردا گول سوعۋ مٷمكٸندٸگٸن ٸزدەدٸ. دەسە دە ەلوردالىق فۋتبولشىلار ولارعا لايىقتى قارسىلىق كٶرسەتتٸ. ويىننىڭ 39-مينۋتىندا قازاقستاندىق كلۋبتىڭ قاقپاسىنا پەنالتي بەلگٸلەندٸ. ونى تەۋن كوولمەينەرس مٷلت جٸبەرگەن جوق. ال 43-مينۋتتا ميرون بواديۋ ەسەپتٸ ٷستەدٸ.
بٸرٸنشٸ كەزەڭدە «استانا» ەكٸ ويىنشىسىن الماستىرۋعا مەجبٷر بولدى. العان جاراقاتىنا بايلانىستى نەناد ەريچتٸ الەكساندر موكين الماستىردى. ودان كەيٸن قورعاۋشى ابزال بەيسەبەكوۆتٸڭ ورنىنا انتونيو رۋكاۆينانى شىعاردى.
ەكٸنشٸ كەزەڭدە ەلوردالىق فۋتبولشىلار گول سوعاتىن بٸرنەشە مٷمكٸندٸكتٸ پايدالانا العان جوق. الاڭ يەلەرٸ ويىن تٸزگٸنٸن ٶز قولىندا ۇستاۋعا تىرىستى. ال 77-مينۋتتا گوللاندييالىق كالۆين ستەنگس «استانا» قاقپاسىنا تاعى بٸر گول سوعىپ كەتتٸ. ال 83-مينۋتتا تەۋن كوولمەينەرس پەنالتيدەن ٶزٸنٸڭ ەكٸنشٸ گولىن سوقسا, 85-مينۋتتا يۋكيناري سۋگاۆارا مەرگەندٸك تانىتتى. الاڭ يەلەرٸ قاتارىنان 90-مينۋتتا ۋسساما يدريسسي قورىتىندى ەسەپتٸ بەلگٸلەدٸ.
وسىلايشا «استانا» قارسىلاسىنان 0:6 ەسەبٸمەن جەڭٸلٸپ قالدى.
ەستەرٸڭٸزگە سالا كەتەلٸك, بۇدان بۇرىن «استانا» توپتىق كەزەڭدە ەكٸ ويىن ٶتكٸزٸپ ٷلگەردٸ. الدىمەن سىرت الاڭدا انگلييانىڭ «مانچەستەر يۋنايتەد» كلۋبىنان 0:1 ەسەبٸمەن جەڭٸلسە, ودان كەيٸن ٶز الاڭىندا سەربييانىڭ «پارتيزانىنا» 1:2 ەسەبٸمەن جول بەردٸ.
ەندٸ «استانا» 7 قاراشا كٷنٸ بٷگٸنگٸ قارسىلاسىمەن ەلوردادا كەزدەسەدٸ.
