Búgin Túrki áleminiń rýhani astanasy – Túrkistan shaharyna «Eýropa-Aziia» halyqaralyq beibitshilik jáne kelisim sherýi at basyn burdy. Úsh eldiń, iaǵni Qazaqstan, Qyrǵyzstan jáne Reseidiń 16 qalasyn aralaýǵa nietti jandar kóne shahardyń kórikti jerlerin aralap, ólkemizdiń tarihymen tanysty, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Aldymen túrli etnos ókilderinen jinalǵan 30-ǵa jýyq marsh qatysýshysy Túrkistandaǵy Q. A. Iasaýi mańyndaǵy saiabaqta kók týdy kókte jelbiretip, saltanatty túrde júrip ótti. Budan soń ashyq aspan astynda arnaiy uiymdastyrylǵan merekelik is-sharany tamashalady.
Tatýlyq pen birlikti dáriptegen jiynǵa Túrkistan qalasy ákiminiń orynbasary Erlan Kúzembaev, Túrkistan oblysy Qazaqstan halqy Assambleiasy janyndaǵy qurylymdarmen jumys júrgizý bóliminiń basshysy Baqytjan Áshirbaev, sondai-aq óńirdegi etnomádeni birlestik ókilderi qatysty.
Sherý qatysýshysy Dinara Ákimbekova mundai marsh bolatynyn esti sala qoldap shyqqanyn aitady. Aqjaýlyqty ana óz balalarynyń, jaqyndarynyń beibit aspan astynda ómir súrgenin qalaidy.
– Bul halyqaralyq sherý shildeniń 1-inde Elordadan bastalǵan bolatyn. Basty maqsat – etnosaralyq jáne konfessiiaaralyq kelisim men tatýlyqty nasihattaý. Dinge, ultqa bólinbei, halyqty birlik pen yntymaqqa, kelisimge shaqyrýdy basty maqsat etedi. Buǵan deiin halyqaralyq marsh Almaty, Qaraǵandy, Nur-Sultan, Bishkek, Taraz qalalary arqyly júrip ótti. Jańarǵan Túrkistan shahary bizdiń osy sherýdegi aralap kele jatqan 7-shi qalamyz eken. Sharaǵa qoldaý bildirgen barsha azamattarǵa alyǵysymyz sheksiz. Endi Túrkistanda biraz aialdap, ary qarai Qyzylorda qalasyna attanamyz, – deidi ol.
Aita ketý kerek, halyqaralyq sherýdiń birinshi kezeńi 4 tamyzǵa deiin jalǵasady. Al ekinshi kezeńi Eýropa, Aziia elderiniń 18 memleketin qamtityn bolady.
