بٷگٸن تٷركٸ ەلەمٸنٸڭ رۋحاني استاناسى – تٷركٸستان شاھارىنا «ەۋروپا-ازييا» حالىقارالىق بەيبٸتشٸلٸك جەنە كەلٸسٸم شەرۋٸ ات باسىن بۇردى. ٷش ەلدٸڭ, ياعني قازاقستان, قىرعىزستان جەنە رەسەيدٸڭ 16 قالاسىن ارالاۋعا نيەتتٸ جاندار كٶنە شاھاردىڭ كٶرٸكتٸ جەرلەرٸن ارالاپ, ٶلكەمٸزدٸڭ تاريحىمەن تانىستى, دەپ حابارلايدى «ۇلت اقپارات» تٷركٸستان وبلىسى ەكٸمدٸگٸنٸڭ باسپاسٶز قىزمەتٸنە سٸلتەمە جاساپ.
الدىمەن تٷرلٸ ەتنوس ٶكٸلدەرٸنەن جينالعان 30-عا جۋىق مارش قاتىسۋشىسى تٷركٸستانداعى ق. ا. ياساۋي ماڭىنداعى ساياباقتا كٶك تۋدى كٶكتە جەلبٸرەتٸپ, سالتاناتتى تٷردە جٷرٸپ ٶتتٸ. بۇدان سوڭ اشىق اسپان استىندا ارنايى ۇيىمداستىرىلعان مەرەكەلٸك ٸس-شارانى تاماشالادى.
تاتۋلىق پەن بٸرلٸكتٸ دەرٸپتەگەن جيىنعا تٷركٸستان قالاسى ەكٸمٸنٸڭ ورىنباسارى ەرلان كٷزەمباەۆ, تٷركٸستان وبلىسى قازاقستان حالقى اسسامبلەياسى جانىنداعى قۇرىلىمدارمەن جۇمىس جٷرگٸزۋ بٶلٸمٸنٸڭ باسشىسى باقىتجان ەشٸرباەۆ, سونداي-اق ٶڭٸردەگٸ ەتنومەدەني بٸرلەستٸك ٶكٸلدەرٸ قاتىستى.
شەرۋ قاتىسۋشىسى دينارا ەكٸمبەكوۆا مۇنداي مارش بولاتىنىن ەستي سالا قولداپ شىققانىن ايتادى. اقجاۋلىقتى انا ٶز بالالارىنىڭ, جاقىندارىنىڭ بەيبٸت اسپان استىندا ٶمٸر سٷرگەنٸن قالايدى.
– بۇل حالىقارالىق شەرۋ شٸلدەنٸڭ 1-ٸندە ەلوردادان باستالعان بولاتىن. باستى ماقسات – ەتنوسارالىق جەنە كونفەسسيياارالىق كەلٸسٸم مەن تاتۋلىقتى ناسيحاتتاۋ. دٸنگە, ۇلتقا بٶلٸنبەي, حالىقتى بٸرلٸك پەن ىنتىماققا, كەلٸسٸمگە شاقىرۋدى باستى ماقسات ەتەدٸ. بۇعان دەيٸن حالىقارالىق مارش الماتى, قاراعاندى, نۇر-سۇلتان, بٸشكەك, تاراز قالالارى ارقىلى جٷرٸپ ٶتتٸ. جاڭارعان تٷركٸستان شاھارى بٸزدٸڭ وسى شەرۋدەگٸ ارالاپ كەلە جاتقان 7-شٸ قالامىز ەكەن. شاراعا قولداۋ بٸلدٸرگەن بارشا ازاماتتارعا الىعىسىمىز شەكسٸز. ەندٸ تٷركٸستاندا بٸراز ايالداپ, ارى قاراي قىزىلوردا قالاسىنا اتتانامىز, – دەيدٸ ول.
ايتا كەتۋ كەرەك, حالىقارالىق شەرۋدٸڭ بٸرٸنشٸ كەزەڭٸ 4 تامىزعا دەيٸن جالعاسادى. ال ەكٸنشٸ كەزەڭٸ ەۋروپا, ازييا ەلدەرٸنٸڭ 18 مەملەكەتٸن قامتيتىن بولادى.
