Eýropa Odaǵyna múshe memleket basshylary 12 jeltoqsanda Ýkrainadaǵy qaqtyǵysqa bailanysty Reseige salǵan ekonomikalyq sanktsiia merzimin taǵy alty aiǵa uzartty.
Birneshe kún buryn Parijde ótken "norman tórttigi" sammitinde Resei prezidenti Vladimir Pýtin jáne Ýkraina basshysy Vladimir Zelenskii alǵash ret kózbe-kóz kezdesip, taraptar jyl sońyna deiin Ýkraina shyǵysynda atysty toqtatý rejimin tolyq júzege asyrýǵa kelisken. Olar sonymen birge ózara tutqyn almasyp, Donbasta ásker men tehnikany qarsylas taraptar turǵan maidan shebinen ishinara áketý úshin 2020 jyldyń naýryzyna deiin úsh qosymsha aimaq belgileýge ýaǵdalasqan.
Alaida Pýtin men Zelenskii jergilikti sailaý ótkizý nemese Reseimen shekaradaǵy aýmaqty Ýkrainaǵa qaitarý siiaqty kúrdelirek másele boiynsha kelisimge kele almaǵan.
Máskeýge salǵan sanktsiia merzimin uzartý týraly sheshim osy sammit qorytyndysyn Frantsiia prezidenti Emmanýel Makron men Germaniia kantsleri Angela Merkel Briýsselde habarlaǵannan keiin qabyldanǵan.
Reseidiń negizinen qarjy, energetika jáne qorǵanys sektoryna qarsy baǵyttalǵan sanktsiiany Eýroodaq eń alǵash ret 2014 jyly engizgen. Bul shekteý sharalardy Máskeýdiń Qyrymdy anneksiialap alýyna jáne Donbastaǵy separatisterdi qoldaýyna bailanysty salǵan. Sodan beri Eýroodaq sanktsiialarynyń merzimin ár jarty jyl saiyn uzartyp keledi. Sanktsiialar tizimi únemi tolyqtyrylyp, naqtylanyp otyrady.
Resei Ýkrainanyń shyǵysyndaǵy janjalǵa qatysy baryn joqqa shyǵarady, al Qyrymdy ózine qosyp alýyn Máskeý "tarihi ádilettilikti qalpyna keltirý" dep ataidy.
