L.Gýmilev atyndaǵy Eýraziia ulttyq ýniversitetinde «Eýraziialyq integratsiia - N.Nazarbaevtyń tarihi bastamasy» taqyrybynda onlain rejimde telekópir ótti, dep habarlaidy QazAqparat.
«Eýraziialyq integratsiia - N.Nazarbaevtyń tarihi bastamasy» taqyrybynda telekópir ótti
Shara aiasynda BAQ ókilderine suhbat bergen atalǵan ýniversitettiń professory, tarih ǵylymdarynyń doktory Maqsat Alpysbes 2015 jyly eýraziialyq integratsiialyq protsestiń naqty nátijesi - Eýraziialyq ekonomikalyq odaqtyń qurylýy bolǵandyǵyn aitady.
«Barlyq protsester tektonikalyq ózgeristerdi kórsetedi. 70 jylǵa jýyq ýaqytqa sozylǵan Sovet odaǵynyń tarihy 1991 jyly aiaqtalǵany belgili. Sol kezde SSSR quramynda bolǵan odaqtas respýblikalardyń arasyndaǵy ekonomikalyq, mádeni bailanystardyń tiimdi jaqtaryn saqtap qalý mańyzdy edi. Osyǵan bailanysty 1994 jyly Qazaqstannyń Tuńǵysh Prezidenti Nursultan Nazarbaev ekonomikalyq turǵydaǵy eýraziialyq integratsiia ideiasyn bastamashy boldy. Bul árine, burynǵy SSSR keńistiginde jańadan qurylǵan TMD elderi aiasyndaǵy qarym-qatynastardyń barlyǵyn beibit túrde birqalypty damýyna baǵyttalǵan ideia edi. Sol ideianyń aiasynda L.Gýmilev atyndaǵy Eýraziia ulttyq ýniversiteti quryldy», - dedi ol.
Ǵalymnyń atap ótýinshe, integratsiialyq protsesterdiń mańyzdy máseleleriniń biri - bul ǵylymi, mádeni, áleýmettik, ekonomikalyq bailanystardy tiimdi baǵytta damytý. Sondyqtan shyǵarmashylyq ziialylardyń, qoǵam qairatkerleriniń yntymaqtastyǵy da mańyzdy.
«Búgingi tańda ekonomikalyq integratsiia ár tarapqa tiimdi bolýy tiis. Bul turǵyda ekonomikalyq bailanystar eki jaqqa da tepe-teń deńgeiin saqtaýy qajet. Eýraziialyq integratsiiaǵa qatysty eki túrli kózqaras bar. Bireýi eýraziialyq integratsiialyq protsesterdi tereńdetý ustanymyn jaqtaidy. Al ekinshi taraptyń pikirinshe: «Eýraziialyq ekonomikalyq integratsiia óziniń damý deńgeiine jetip, nátijesin berip otyr. Endi munan keiin memleketústilik qurylymdar Qazaqstan úshin jaýap bere almaidy». Bizdiń oiymyzsha, rasynda eýraziialyq ekonomikalyq integratsiialyq protsester óziniń tolyq deńgeiine jetti. Endigi másele osy ekonomikalyq odaq aiasyndaǵy 5 memleket, iaǵni, Qazaqstan, Qyrǵyzstan, Resei, Armeniia jáne Belarýs bir-biriniń ulttyq táýelsizdigin qurmettep, tepe-teń qarym-qatynas jasaýy tiis», - dedi Maqsat Alpysbes.
.jpeg)