Advokat Damir Saldinov BAQ arqyly jol-kólik oqiǵasy saldarynan kóz jumǵan Eskendir Súleimenovtiń ata-anasynyń úndeýin jariialady, dep habarlaidy QazAqparat tilshisi.
«Biz ókinishti, kóńil bildirýdi, shynaiylyq pen óz aiybyn jýyp-shaiýǵa degen umtylysty kórmedik. Sottalýshynyń kózinde tek ózi úshin úrei, qatań jazadan qorqynysh, bas bostandyǵynan aiyrylýdan seskený ǵana bar. Júreginiń túkpirinde zańda qarastyrylǵan jaýapkershilikten jaltarýǵa degen úmit tur. Barlyq sot otyrystary barysynda qorǵaýshy men qorǵalýshy sotqa deiingi tergeý amaldary aiasynda belgili bolǵan barlyq jaiǵa kúdik-kúmán keltirýge tyrysqandyqtan, búgingi tańda Malika Muhitovaǵa meiirimdilik tanytýdy jón kórip otyrǵan joqpyz», - dedi kóz jumǵan jigittiń ákesi Sergei Han.
Ol sonymen birge, munyń bári de ulyn joǵaltqan qaiǵysyn basa almaitynyn aitady.
«Áke jáne sheshe retinde bizdiń júregimizdegi qaiǵy basylatyn emes. Ómirdegi eń úlken qasiret - ata-anasynyń balasyn jer qoinyna tapsyrýy. Mine, sondyqtan bizdiń elde basqanyń aiyby úshin óz balasyn kómýge májbúr bolǵan ata-analar az bolsa deimiz», - deidi Eskendirdiń ákesi.
Óz kezeginde Eskendirdiń anasy sot otyrysyna BAQ ókilderiniń qatysýyna qarsy bolǵanyn, biraq buny aiyptalýshy tarap qaitpai qalaǵanyn atap ótken.
«Bizdiń bul hatty jazýdan basqa amalymyz qalmady. Sebebi, bótenniń qaiǵysyn bólise almaityn jáne sensatsiiaǵa qumar jýrnalister bizdiń qasiretimizdi kórsete otyryp, qaiǵymyzǵa qaiǵy jamaidy. Bizdiń otbasymyzǵa bunyń keregi joq! Bizdiń qaiǵymyzdyń shegi joq. Júrektegi jaramyzdy eshkim de jaza almas. Sot protsesinde jýrnalisterdiń qatysýyna qarsy boldyq. Alaida sot túsirilim jasaýǵa, suhbat berýge ruqsat berdi. Bul rette tek jábirlenýshilerdi, iaǵni bizdi ǵana túsirmeý mindetteldi. Bul kimge kerek edi? Sotqa jýrnalisterdi kim shaqyrdy? Álbette, sottalýshy, týystary men advokat», - deidi Leila Súleimenova.
Onyń paiymynsha, jýrnalisterdi arnaiy sotqa shoý jasaý úshin shaqyrǵan.
«Malika Muhitova - jaǵdaidyń qaiǵy shegýshi jáne ókinýshi qurbany. Advokat D. Kýriachenko - qoiylymnyń ortasyndaǵy figýra. Onyń ústine aiybyn moiyndap otyrǵan óziniń qorǵaýyndaǵy adamnyń ustanymyn eskermei advokat óz rólin ózinshe oinady. Advokat óziniń mindetin - qorǵaý, sol arqyly qorǵaýyndaǵy adamdy jaýapkershilikten alyp ketý, aiypty bizdiń ulymyzǵa kináni artý dep biledi. Sońǵy sot otyrysyndaǵy onyń jalyndy sózi osy málimdemeni jasaýǵa túrtki bolyp otyr. Advokat D. Kýriachenko qoǵamdaǵy adamnyń moraldyq jáne etikalyq normalaryn óreskel buzdy dep esepteimiz. Óz sózinde advokat óziniń qorǵalýshysy týraly aityp qana qoimai, Eskendirdiń atasy - Oljas Súleimenovtyń tarihtaǵy róli men mańyzy, eńbegi týraly da sóiledi. Álemdik tarihtaǵy Oljas Omarulynyń mańyzdy róli men biografiiasy týraly basqa jaǵdaida jiliktep aitylýyn túsinýge bolar edi. Biraq, áigili jazýshynyń nemeresiniń ólimi qaralyp jatqan protseste - adamgershilikten tys arsyzdyqqa uqsap ketti», - deidi qaitys bolǵan jigittiń anasy.
Aita ketsek, ótken aptanyń jumasynda jol-kólik oqiǵasyna kináli retinde sot isi qaralyp jatqan Malika Muhitova sotta kóz jasyna erik berip, bolǵan iske ókinetinin aitqan edi.
«Bul eki otbasynyń qaiǵysy. Men ony eshqashan umyta almaimyn. Júrektegi osy júkpen ómir súrýime týra keledi. Men aiaǵymnan endi ǵana tik turyp, óz kúnimdi ózim kóre bastaǵanmyn. Ákem kelesi jyly zeinetke shyǵady. Ata-anama kómektesermin degen oimen júrgen edim. Bul jaǵdai bizdiń otbasylarymyzdy bir qiylysta keziktirdi. Eskendirdiń otbasy meni keshirgenin qalaimyn. Meniń muny jasaǵym kelmedi. Men taǵy da Eskendirdiń atasy men ájesinen, ata-anasynan keshirim suraǵym keledi. Bul - bizdiń de otbasynyń qasireti. Men bas bostandyǵynan aiyrar jaza taǵaiyndamaýdy suraimyn. Biz barlyq kómekti kórsetýge daiynbyz», - degen edi Malika Muhitova.
Eske sala ketsek, osy jyldyń maýsymynda Astanadaǵy jol apatynda Oljas Súleimenovtiń 26 jastaǵy nemeresi Eskendir Súleimenov mert boldy. Eskendir tizgindegen mototsikl qiylysqa shyqqan kólikke soǵyldy.
Arada kóp ótpei Astana qalalyq Ishki ister departamenti apatqa sebepker bolýy múmkin Hyundai avtokóliginiń iesi, 29 jastaǵy astanalyq kelinshekke qatysty tergeý amaldary júrip jatqanyn habarlaǵan edi.
Aita ketsek, 12 qazanda Oljas Súleimenovtiń nemeresiniń ólimine qatysty sot protsesi bastalyp, Eskendir Súleimenov qaza tapqan jol apaty boiynsha sottalýshy Malika Muhitova marqumnyń ata-anasynan keshirim suraǵan bolatyn.
Is boiynsha prokýror Á.Baraev sottan aiyptalýshyny 2 jylǵa bas bostandyǵynan aiyrýdy surap otyr.
