Foto: Tengrinews.kz
Ónerkásip jáne qurylys ministri Qanat Sharlapaev "ArselorMittal Temirtaý" AQ-nyń menshik iesi aýysatynyna qatysty túsinikteme berdi, dep habarlaidy Sputnik Qazaqstan.
Onyń aitýynsha, sheteldik investordan eshkim eshteńe tartyp almaidy.
"Qazaqstan halyqaralyq investorlardyń quqyǵyn qurmetteidi, eshkimnen eshteńe tartyp almaidy. Biraq ónerkásip qaýipsizdigi, qyzmetkerler men jumys oryndarynyń qaýipsizdigin qamtamasyz etý boiynsha talaptar bar. Sol sebepti Qazaqstandaǵy sheteldik investorlar osy talaptardy saqtaýǵa tiis. Biz olardan qyzmetkerlerdiń qaýipsizdik talaptaryn tolyq kólemde saqtaýyn talap etemiz", - dedi Sharlapaev Úkimette ótken brifingte.
Onyń aitýynsha, zańnamalyq mehanizm boiynsha, eger sheteldik investor qazaqstandyq naryqtan ketkisi kelse, ol basqa investormen nemese Qazaqstanmen osy aktivti satý-satyp alý kelisimshartyn jasasady.
"Al bireý áldekimnen bir nárseni tartyp alady dep aitý – Qazaqstanda biz mundaidy kórmeimiz degen úmittemin. Sebebi bul investitsiialyq ahýalǵa úlken soqqy bolady", - dep sanaidy ministr.
Sharlapaev kompaniia quramyndaǵy aktsionerlerdiń ózgerýi kelisimshart-quqyqtyq qatynas negizinde Azamattyq kodekske sáikes júrgiziletinin atap ótti.
"Sol sebepti bireý bireýden tartyp alady degen áńgimeni doǵaraiyq. Kelisimsharttyq-quqyqtyq qatynas bar, biz halyqaralyq investorlarmen sonyń aiasynda jumys isteimiz", - dep túiindedi sózin Sharlapaev.
Buǵan deiin BAQ pen áleýmettik jelide "ArselorMittal Temirtaý" AQ nysandary reseilik "Severstal" kompaniiasyna satylýy múmkin ekeni týraly qaýeset tarady.
Alaida premer-ministrdiń birinshi orynbasary Roman Skliar bul aqparatty joqqa shyǵardy. Onyń aitýynsha, reseilik kompaniiamen eshkim kelissóz júrgizip jatqan joq.
"Kásiporyndy damytýǵa qarajat investitsiialai alatyn basqa investorlardy tartý boiynsha jumys júrip jatyr", dedi ol.
