Almatyda ótken onlain brifingte dáriger-infektsionist Tamara Ýtaǵanova halyqtyń aýyrmasa da, dári-dármekti aldyn ala alyp, jinaýyna qatysty pikir bildirdi, dep habarlaidy QazAqparat.
«Aldyn ala dári satyp alyp, qor jinap, úide qoima jasaýdyń qajeti joq. Keiin dáriger em-domdy sizdiń úiińizde bar dárige qarap taǵaiyndamaidy. Sondai-aq, olardyń jaramdylyq merzimi de bar», - deidi T.Ýtaǵanova.
Dárigerdiń aitýynsha, antibiotik - virýsty pnevmoniiany emdeýde eń birinshi qajet dári emes. Ony tek bakterialdy asqyný, ekinshi infektsiia qosylǵan jaǵdaida taǵaiyndaidy.
«Bizge kelgen naýqastardyń kópshiligi úiinen antibiotiktiń bir emes, birneshe túrin alyp keledi. Antibiotikten de aǵzada allergiia bolýy múmkin. Keiin disbakterioz týyndaýy yqtimal. Sonymen ol kerisinshe aǵzanyń qorǵanys qabiletin tómendetedi»,- deidi dáriger.
Onyń aitýynsha, koronavirýs infektsiiasynan kóbine eresek adamdar japa shegedi.
«Balalarda jeńil ótetini ras. Biraq, bul sanitarlyq normalardy saqtamaý kerek degendi bildirmeidi. Mindetti túrde saqtyq sharalary jasalýy kerek», - dedi ol.
