الماتىدا ٶتكەن ونلاين بريفينگتە دەرٸگەر-ينفەكتسيونيست تامارا ۋتاعانوۆا حالىقتىڭ اۋىرماسا دا, دەرٸ-دەرمەكتٸ الدىن الا الىپ, جيناۋىنا قاتىستى پٸكٸر بٸلدٸردٸ, دەپ حابارلايدى قازاقپارات.
«الدىن الا دەرٸ ساتىپ الىپ, قور جيناپ, ٷيدە قويما جاساۋدىڭ قاجەتٸ جوق. كەيٸن دەرٸگەر ەم-دومدى سٸزدٸڭ ٷيٸڭٸزدە بار دەرٸگە قاراپ تاعايىندامايدى. سونداي-اق, ولاردىڭ جارامدىلىق مەرزٸمٸ دە بار», - دەيدٸ ت.ۋتاعانوۆا.
دەرٸگەردٸڭ ايتۋىنشا, انتيبيوتيك - ۆيرۋستى پنەۆمونييانى ەمدەۋدە ەڭ بٸرٸنشٸ قاجەت دەرٸ ەمەس. ونى تەك باكتەريالدى اسقىنۋ, ەكٸنشٸ ينفەكتسييا قوسىلعان جاعدايدا تاعايىندايدى.
«بٸزگە كەلگەن ناۋقاستاردىڭ كٶپشٸلٸگٸ ٷيٸنەن انتيبيوتيكتٸڭ بٸر ەمەس, بٸرنەشە تٷرٸن الىپ كەلەدٸ. انتيبيوتيكتەن دە اعزادا اللەرگييا بولۋى مٷمكٸن. كەيٸن ديسباكتەريوز تۋىنداۋى ىقتيمال. سونىمەن ول كەرٸسٸنشە اعزانىڭ قورعانىس قابٸلەتٸن تٶمەندەتەدٸ»,- دەيدٸ دەرٸگەر.
ونىڭ ايتۋىنشا, كوروناۆيرۋس ينفەكتسيياسىنان كٶبٸنە ەرەسەك ادامدار جاپا شەگەدٸ.
«بالالاردا جەڭٸل ٶتەتٸنٸ راس. بٸراق, بۇل سانيتارلىق نورمالاردى ساقتاماۋ كەرەك دەگەندٸ بٸلدٸرمەيدٸ. مٸندەتتٸ تٷردە ساقتىق شارالارى جاسالۋى كەرەك», - دەدٸ ول.
