قازاق ەدەبيەتٸنٸڭ كٶرنەكتٸ ٶكٸلٸ, جازۋشى ەرٸ دراماتۋرگ ورالحان بٶكەيدٸڭ وتباسىمەن بٸرگە تٷسكەن سيرەك ارحيۆتٸك ۆيدەوسى ەلەۋمەتتٸك جەلٸدە تارادى, دەپ حابارلايدى ult.kz.
بەينەجازبادا قالامگەردٸڭ وتباسى ورتاسىنداعى قاراپايىم ەرٸ جىلى سەتتەرٸ كٶرٸنٸس تاپقان. كٶپشٸلٸك كٶبٸنە شىعارمالارى مەن ەدەبي مۇراسى ارقىلى تانيتىن جازۋشىنىڭ كٷندەلٸكتٸ ٶمٸرٸنەن سىر شەرتەتٸن كادرلار جەلٸ قولدانۋشىلارىنىڭ ەرەكشە ىقىلاسىنا يە بولدى.
ورالحان بٶكەي كٸم?
ورالحان بٶكەي 1943 جىلى 28 قىركٷيەكتە شىعىس قازاقستان وبلىسى كاتونقاراعاي اۋدانىنىڭ شىڭعىستاي اۋىلىندا دٷنيەگە كەلگەن. ول قازاق پروزاسىنا ٶزٸندٸك ٶرنەك, ەرەكشە تٸل مەن تەرەڭ فيلوسوفييالىق وي الىپ كەلگەن قالامگەرلەردٸڭ بٸرٸ سانالادى.
جازۋشىنىڭ «قايداسىڭ, قاسقا قۇلىنىم», «مۇزتاۋ», «قار قىزى», «سايتان كٶپٸر», «اتاۋ كەرە», «بٸزدٸڭ جاقتا قىس ۇزاق» سەكٸلدٸ شىعارمالارى قازاق ەدەبيەتٸنٸڭ التىن قورىنا ەندٸ. ونىڭ تۋىندىلارىندا ادام تاعدىرى, تۋعان جەرگە دەگەن ساعىنىش, جالعىزدىق, تابيعات پەن ادام اراسىنداعى بايلانىس كەڭٸنەن سۋرەتتەلەدٸ.
ورالحان بٶكەي ۇزاق جىلدار باسپاسٶز سالاسىندا دا ەڭبەك ەتتٸ. «لەنينشٸل جاس», «جۇلدىز», «قازاق ەدەبيەتٸ» باسىلىمدارىندا قىزمەت اتقارىپ, كەيٸن «قازاق ەدەبيەتٸ» گازەتٸنٸڭ باس رەداكتورى بولدى. قالامگەردٸڭ شىعارمالارى بٸرنەشە شەت تٸلٸنە اۋدارىلعان.
ول 1993 جىلعى 17 مامىردا ٷندٸستاننىڭ دەلي قالاسىندا شىعارماشىلىق ٸسساپار كەزٸندە ٶمٸردەن ٶتتٸ. ارتىندا مول ەدەبي مۇرا قالدىرعان جازۋشىنىڭ شىعارمالارى بٷگٸنگە دەيٸن قايتا باسىلىپ, وقىرماننان قول ٷزگەن جوق.
ال جەلٸدە تاراعان بۇل ارحيۆتٸك ۆيدەو وقىرمانعا ورالحان بٶكەيدٸ قالامگەر رەتٸندە عانا ەمەس, وتباسى ورتاسىنداعى قاراپايىم ادام رەتٸندە دە كٶرۋگە مٷمكٸندٸك بەردٸ.
