Qazaq ádebietiniń kórnekti ókili, jazýshy ári dramatýrg Oralhan Bókeidiń otbasymen birge túsken sirek arhivtik videosy áleýmettik jelide tarady, dep habarlaidy ult.kz.
Beinejazbada qalamgerdiń otbasy ortasyndaǵy qarapaiym ári jyly sátteri kórinis tapqan. Kópshilik kóbine shyǵarmalary men ádebi murasy arqyly tanityn jazýshynyń kúndelikti ómirinen syr shertetin kadrlar jeli qoldanýshylarynyń erekshe yqylasyna ie boldy.
Oralhan Bókei kim?
Oralhan Bókei 1943 jyly 28 qyrkúiekte Shyǵys Qazaqstan oblysy Katonqaraǵai aýdanynyń Shyńǵystai aýylynda dúniege kelgen. Ol qazaq prozasyna ózindik órnek, erekshe til men tereń filosofiialyq oi alyp kelgen qalamgerlerdiń biri sanalady.
Jazýshynyń «Qaidasyń, qasqa qulynym», «Muztaý», «Qar qyzy», «Saitan kópir», «Ataý kere», «Bizdiń jaqta qys uzaq» sekildi shyǵarmalary qazaq ádebietiniń altyn qoryna endi. Onyń týyndylarynda adam taǵdyry, týǵan jerge degen saǵynysh, jalǵyzdyq, tabiǵat pen adam arasyndaǵy bailanys keńinen sýretteledi.
Oralhan Bókei uzaq jyldar baspasóz salasynda da eńbek etti. «Leninshil jas», «Juldyz», «Qazaq ádebieti» basylymdarynda qyzmet atqaryp, keiin «Qazaq ádebieti» gazetiniń bas redaktory boldy. Qalamgerdiń shyǵarmalary birneshe shet tiline aýdarylǵan.
Ol 1993 jylǵy 17 mamyrda Úndistannyń Deli qalasynda shyǵarmashylyq issapar kezinde ómirden ótti. Artynda mol ádebi mura qaldyrǵan jazýshynyń shyǵarmalary búginge deiin qaita basylyp, oqyrmannan qol úzgen joq.
Al jelide taraǵan bul arhivtik video oqyrmanǵa Oralhan Bókeidi qalamger retinde ǵana emes, otbasy ortasyndaǵy qarapaiym adam retinde de kórýge múmkindik berdi.
