QR Bilim jáne ǵylym ministrligi sabaqty onlain ótkizýdi toqtatý kerek degen sheshimge keldi. Bul týraly Ortalyq kommýnikatsiialar qyzmetiniń alańynda ótken mektep oqýshylarynyń IV toqsanda qashyqtan oqý júiesine arnalǵan onlain konferentsiiada aityldy, dep habarlaidy "Ult aqparat".
«Ustazdarmen birneshe onlain kezdesý ótkizdim. Sonda qashyqtan oqytý týraly usynystar túsip jatyr. Biz ol usynystarmen kelisip, sabaqty onlain ótkizýdi toqtatý kerek degen sheshimge keldik. Men aitqan platformalarmen jumys isteýdiń birneshe tiimdi jaǵy bar. Bul júie boiynsha ártúrli suraqtar týyndaityn bolady», - deidi QR Bilim jáne ǵylym ministri Ashat Aimaǵambetov.
Onyń aitýynsha, qazirgi ýaqytta barlyq tekserý toqtatyldy.
«Qazirgi kezde muǵalimderden, mektepterden jinalatyn esepter kóp bolyp ketti. Bul esepterdi toqtatý týraly buiryq shyǵardyq. Eshqandai muǵalimnen synyp jýrnalynan basqa eshqandai esep talap etilmeýi kerek degen sheshim qabyldadyq. Qazirgi jaǵdaidy ózderińiz bilesizder, sondyqtan búgingi kúni balalarymyzǵa, ustazdarymyzǵa, áriptesterimizge senýimiz kerek. Keibir jerlerde ótkizip jatqan sabaqtyń skrinshotyn talap etedi, keibir jerde ótkizgen sabaqty videoǵa túsirip alýdy talap etedi. Osyndai keleńsiz jaǵdailarǵa kózimiz jetip otyr. Mundai nársege jol bermeimiz, sondyqtan eshqandai esepter qajet emes. Óńirlerde baqylaý basqarmalary bar, ol departamentterge de osyndai tapsyrma berdi. Endi olar tekseris júrgizbek túgili, ustazdardan esepti talap etpeý máselesin qadaǵalap otyratyn bolady. Biz úirengen dástúrli oqý kestesi de bolmaidy. Bala tapsyrmany ózine yńǵaily ýaqytta oryndaidy. Eń bastysy – bizge nátije kerek. Ol nátijeni biz jinaqtyq baqylaýda kórip otyramyz. Jalpy balalarymyzǵa senip, qoldaýymyz kerek», - deidi QR Bilim jáne ǵylym ministri Ashat Aimaǵambetov.
